Pathian Lal Ram Sawrkar tana Inkhawmpui nei dawn

Zofate khawvel a la awm ngailo ‘Pathian Lal Ram Sawrkar tana Inkhawmpui’ chu thla thar December 1 atang 3 chhung khian Aizawl Chanmari YMA Hall-ah neih a ni dawn.

Nimin a Aizawl Press Club-a thuthar thehdarhtute an kawmna ah Zoram Thar Zofate Lairelna Inpui hruaitute chuan he thu hi sawiin, Inkhawmpui thupui ah ‘I thovang u khai i din teh tak ang u’ tih hman a ni dawn a ni.

Rev. Dr. Zaichhawna Hlawndo chuan Lalpa’n England atanga a koh hawnna chhan chu Zofate kulh chim rem rum din that a ni tih sawiin, Zofate kulh siamthatna chu ram rorelna ah tan hmasak ber tur a ni a. Kan rama party politics hmanga rorelna party sawrkar hi Pathian Lal Ram Sawrkar a thlak tawh tur a ni dawn a. Chumi atan chuan kum 2023 Mizoram Inthlanpui lo awm turah hian Lalpa Chhiahhlawh Intel-khawm te an lo ding dawn a ni, a ti bawk.