JAC te PIL thehluh ngaihtuah
JAC on Serchhip District Hospital Site te PIL thehluh hi niminpiah khan High Court chuan ngaihtuahin Scrutiny a paltlang hnuah nimin khan Judge 2 thutna Divisional Bench, Justice Nelson Sailo leh Justice Marli Vankung te chuan an ngaihtuah nghal a, hemi chungchang ah hian JAC on Serchhip District Hospital Site Chairman Kapliana Pachuau chuan Serchhip District Hospital sakna tura Chief Minister hova May ni 27, 2022-a Memorandum of Understanding (MoU) ziah ah leh Hospital Detailed Project Report (DPR)-ah a hmun ngaia sak tur tih a ni a, hemi tidanglam a Bukpui-a sak tur ang zawng hian sawrkar in Official a hmalakna pakhatmah a la nei lova, chuvang chuan a hmun ngaia Hospital hi sak ngei turah Court chuan a ngai tih an sawi tih LENKAWL a hrilh a. Sawrkar in MoU leh DPR ang lova hmundanga sak tuma hmalakna Official-a a nei a nih phawt chuan PIL thehlut nawn leh turin JAC Ukil te zalenna (Liberty) a pe niin a sawi bawk.
JAC on Serchhip District Hospital Site hruaitute chuan Gauhati High Court in rang taka an thubuai ngaihtuahna hun a siamsak chu lawmawm an tih thu an sawi a. Sawrkar hmalakna an thlir reng dawn tih sawiin, mipui mamawhna a san tawh avangin a rang thei ang bera Serchhip District Hospital Building sa thuai turin Mizoram sawrkar an ngen nawn leh tih an sawi a, MoU leh DPR-a inziak ang lova sawrkar in hma a la a nih chuan High Court in a phalsak angin PIL thehluh leh ngei an tum tih an sawi bawk.
Comments
Post a Comment