Home Minister in Mangaldai (Assam)-a 3rd IR (Mizo) Battalion awm mek te a tlawh

Home Minister Lalchamliana chuan nimin zing khan Mangaldai khuaa 3rd IR (Mizo) Battalion-a Mizo Police awm mekte tlawhin an hmunhma te a fang a, Sammelan a hmanpui bawk.

Guwahati atanga km 80 vela hlaa awm Mangaldai-a IR hmun a tlawhna ah hian Home Minister chuan Mizo IR Assam-a awm ten an chhehvela cheng mipuite leh vantlang nen inlaichinna tha an nei zel chu lawmawm tiin Force reng reng te hi an bulhnaia awm mipuite nen thawhhona tha leh inlaichinna tha neih chu an tihmakmawh tur a nih thu leh hei hi anni pawhin vawng nung zel turin a chah a. An kalna apiangah Mizoram tihmingtha thei emaw tihmingchhe thei emaw an ni tih hre reng chunga an duty-na te hlen turin IR Police te a chah bawk.

Home Minister chuan IR Police te chu Mizoram pawna kum 12 chuang an awm chhungin hel emaw, misual emaw kutah boral leh hliam an awm lo chu lawmawm a tih thu sawiin, hei hi Pathian hruaina a nih thu a sawi a. Hotute thu awih a, inthununna hnuaia awm chu Police nih dan tur an hriat sa ni mahse hei hi sawi nawnin thil tha lo, an taksa tichhia a, an ngaihtuahna tibuai thei te tih lo leh heng laka insum chu ngai pawimawh turin a chah a. Kohhran thilpek leh rawngbawlna kawnga an luanchhuahnate chu ropui tiin hei hi chhawm nung zel turin a chah bawk a ni.

Sammelan programme hi DIG (Armed) Dinesh Kumar chuan kaihruaiin B. Laldikpuia CO, 3rd IR in an Battalion chanchin a sawi bawkah thilpek hlanna te a nei a. Jacob Hlychho in lawmthu sawiin hun a khar a ni. Home Minister hian tul dang leh Krismas atan an hman tur sumfai a hlan nghal bawk a ni.

Home Minister hian Mangaldai-a IR hmun a tlawh hnuin Mangaldai atanga darkar 2 leh a chanve tlana hla 3rd IR duty na post 2 - Nagrijuli leh Tamulpur te tlawhin helaia hmuna Mizo Police Duty mek te chu an awmna apiangah Mizoram leh Mizote hmel timawitu ni zel turin a chah a ni.

3rd IR Battalion hi kum 2007 khan ding tanin kum 2010 atangin Mangaldai, Assam-ah an awm a. Chhatisgarh-a Naxal hel awmna hmun ah te pawh tum engemaw zat tirh an nih bakah inthlan duty-ah pawh an fehchhuak nasa a. Hei bakah hian Assam-a District 5 - Golaghat, Tamulpur, Hojai, Nagaon leh Darrang-ah te hmun 19 laiah Duty Post te an nei mek a ni. Tunah hian an vaiin mi 275 vel awmin chung zing mi 40 vel chu chhungkua in an khawsa mek a ni.