Tuikum bialtu MLA in Play-ground leh MHIP Run hawng

Nimin khan Tuikum bialtu MLA leh Assembly Deputy Speaker Er. Lalrinawma chuan a bial chhung Khumtung khuaa Playground thar hawnna hun hmanpuiin Darlawng-a MHIP Run sak thar chu a hawng bawk.
Khumtung Playground hawnna leh Playground thar puala Ramlai Zone Football Championship hawnna neih ah bialtu MLA Er. Lalrinawma chuan Khumtung khawtlang mipuite inpekna a zarah khelmual tha tak an hawng thei ta tih sawiin, Khawtlang mipuite a lawmpui thu leh tangkai taka hmang zui turin duhsakna a hlan a, a enkawl zui kawng ah mipuite tangruala, lo duat turin a chah bawk. Bialtu MLA chuan infiammite chu tualchhung inelna ringawta duhtawk lova, hmundang leh ramdang ah inelna sang zawka tel thei khawpa rilru leh taksa lama inbuatsaih turin a fuih a, Football chu Mizo thalaite thiam chi infiamna, kan thalai tam tak ten sum tam tak hlawha ei an zawn mekna a ni tih sawiin, Khumtung thalaite pawhin chu chu an thleng ve thei tih a sawi a. Infiamna hrang hrang kan tuipui rualin kan nitin nunphung lam te pawh uluk a ngaih thu a sawi bawk.

Khumtung Playground hawnna hi Ramlai Zone FA President Lalnunmawia chuan kaihruaiin Khumtung GSA leh Baktawng GSA-II ten a hawnna inkhel an nei zui a ni.

Tuikum bialtu MLA hian nimin chawhnu lam khan a bial chhung Darlawng khua a MLA Fund hmanga MHIP Run sak thar chu a hawng bawk a, Darlawng MHIP Fin. Secretary Sang-chuailovi kaihhruai he hunah hian bialtu MLA chuan Mizo Society-ah hmeichhiate mawh-phurhna leh an dinhmun pawimawhzia sawiin, chhungkua, ram leh khawtlang tana Mizoram puma MHIP te hmalak thinna chu fakawm a tih thu a sawi bawk.