AAP in nakum-a Assembly inthlan neih turah Candidate a tam thei ang ber indah an tum

Mizoram-a Aam Aadmi Party (AAP) hruaitute chuan nimin khan Serchhip rawn tlawhin Mizoram-a AAP an lakluh chhan chu Lal Isua duh dan a rorel an tum tlat vang a nih thu an sawi a. Nakum-a Mizoram inthlanpui nei turah theihtawp chhuaha Candidate a tam thei ang ber in dah an tum thu an sawi.

AAP Mizoram hruaitute hian nimin khan an Chairman Andrew Lalremkima hovin Serchhip Press Club-ah thuthar thehdarhtute kawmin Mizoram-a sawrkarna lo chelh tawhtute leh chelh tumtute chuan Mizoram ni lovin anmahni Party bil hlawkna tur bak an ngaihtuaha an hriat loh thu leh ram hmasawnna an khawih chhun langsar taka an lantirna phena mipui sum hmanga an invulh lian chu AAP chuan tha an tih loh thu an sawi a. Hetiang Politics hi paihbo an duh thu leh hetiang renga kan ram hi a kal a nih chuan chhan tlakloh ah Mizoram hi a chhuak mai dawn niin an sawi a ni. Party dang ten sum hmachhuana rorelna chan an tum thin chu tha an ti lo hle tih sawiin, hei hian Mizoram tan rah tha pakhatmah a chhuah loh thu leh a chhuah ngai dawn loh thu an sawi a. “Chuvang chuan dilna leh rinawmna hmachhuan chungin AAP Mizoram chuan hma a la zel dawn a, sum uchuak taka seng lo hian Mizoram hi a hmangaih theih a, inthlanna ah hian a tlin theih a ni tih a taka lantir kan tum tlat a ni,” an ti.

Tunah hian Central lam atangin Mizoram-a an Party hawnna hi an la neih chiah loh thu leh tihtur tul ang te erawh an tifel tawh tih AAP hruaitute chuan sawiin, tunah hian member an inzawn rualin hruaitu tur an inzawng pah tih an sawi a. Inlawmluh leh Unit din lam chu an rilru-ah a lian ber lo tih sawiin, inthlanna ah hnehna changa thuneihna an chang lo a nih pawhin anmahni avanga thil tha a chhuah chuan an lawm dawn tih an sawi bawk.

Nakum-a Mizoram Assembly inthlan ah chuh ve an tum thu leh theihtawp chhuah an tum thu he hunah hian sawiin, “Candidate a tam thei ang ber indah a, Lalpa duhdan a rorelna siam ngei thei turin hma kan la zel dawn a ni,” an ti a. Eirukna a tel loh chuan ram in hma a sawn dawn tih pawh AAP hruaitute chuan sawiin, mipuite thleng phak sawrkar din chu an ngaih pawimawh a nih thu an sawi a, Manifesto tam tak siam an tum loh thu leh an tih theih ngei turte chauh an tarlan tur thu te, Kristian ram kan nih angin a tha lamah India rama No. 1 kan nih theih thu te pawh sawiin, mi hmingtha te chu an Party ah an lawm reng tih an sawi bawk.

Comments

Popular posts from this blog