Serchhip District Bawrhsap in Serchhip Town Inter- Departments Sports, 2022 a hawng
Serchhip Officers' Club (SOC) buatsaih Serchhip Town Inter- Departments Sports, 2022 hawnna hunah hian Bawrhsap Nazuk Kumar chuan sawrkar hnathawkte chu Department hrang hrangah an awm tih sawiin, hna erawh kawng tinrengin an thawkho thung tih a sawi a. Chuvang chuan inunauna tha leh thawhhona tha tak an neih a tul hle thin tih sawiin, “Inter- Departments Sports, Serchhip Officers' Club ten an buatsaih hi inunauna leh inthian that nan a tangkai em em a ni,” a ti a. Sawrkar hnathawk te hian taksa leh rilru hrisel neih an mamawh thu pawh sawiin, “Ram leh mipuite tana kan theihna sang ber kan hlan theih nan taksa sawizawina kan uar a tul hle a ni. Chuvang chuan sawrkar hnathawk zawng zawng te infiamna discipline engemaw tak ti thin turin ka ngen a, Serchhip Officers' Club pawhin a theih phawt chuan kum khatah vawi khat chauh nilovin vawi hnih pawh buatsaih thei hial se a tha hle a ni,” a ti bawk.
Serchhip Town Inter-Departments Sports, 2022 hawnna hun hi Organising Chairman leh Taxation Department-a Asst. Commissioner Vanlalruata Ralte chuan kaihruaiin Organising Secretary H. Lalengzauva hnen atangin report ngaihthlak a ni a, Inter-Departments Sports hi ni hnih (2) chhung neih tura ruahman niin sawrkar Department leh Zirna In hrang hranga thawktute chu Group pariat (8)-ah inthenin inelna hrang hrang heng- Badminton, Corrom Board, Chinese Checker, Dart Throw, Penalty Shoot, Ketaminu Race, Spoon Relay Race, Sairawkherh inperhsiak, Table Tennis leh Shooting-ah te inelna an nei dawn a, nimin-a a hawnna hunah hian Serchhip DIPRO K. Saitluanga kaihhruaina hnuaiah Group hrang hranga Leader te hian thianghlim taka inelna nei turin thutiam an chhamrual bawk a ni. He Sports hi ni 2 chhung chauh neih tura ruahman a nih avangin discipline thenkhat ah chuan a hawnna neih hma hian inelna neih a lo ni tawh bawk a ni.
Serchhip Officers' Club te hian Inthlanpui (General Election) neih kum emaw, harsatna dangin a tlak buak a nih loh chuan kumtin Inter-Departments Sports hi an buatsaih thin a, tun tuma Sports an neih mek pawh hi Department hrang hranga thawktu ten an hlut hle a ni.
Comments
Post a Comment