Union Minister leh Assembly Speaker inkawm

Zan hnih riaka Mizoram-a rawn zin Union Minister of State Ashwini Kumar Choubey leh Mizoram Legislative Assembly Speaker Lalrinliana Sailo te chu niminpiah tlai khan Assembly Speaker Office Chamber-ah an inkawm.

Assembly Speaker Lalrinliana Sailo chuan Ashwini Kumar Choubey chu Union Minister zinga Mizoram Assembly House tlawh hmasa bertu a nih thu hrilhin, lawmthu a sawi a. Mizoram Assembly dinhmun leh hmalakna hrang hrangte hrilhfiahin, e-vidhan project hnuaiah lehkha tel loin rorelna (paperless assembly session) an kalpui thuai dawn thu a sawi a. Mizoram-a hmasawnna hnathawh hrang hrang ten leilung an tichereu thin chu pawi a tih thu hrilhin, Union Minister chu hemi kawngah hian hmalakpui turin a ngen a ni.

Union Minister Ashwini Kumar Choubey chuan Mizoram chu ram nuam leh boruak thianghlim awmna a nih avangin nuam a tih thu a sawiin, Mizoram hmun zaa thena hmun 85 zet ramhnuai in a khuh chu hmun danga awm ve lo, thil chhinchiahtlak tak a ni, a ti a. Hmarchhak State te hmasawnna chu PM Narendra Modi kaihhruai sawrkar chuan a ngaihpawimawh thu sawiin, ram leilung venhim leh hmasawnna hnathawh te chu kalkawptir thiam a ngai tih a sawi a. Kum 70 liam ta chhunga hmarchhak harsatna te chu hun reilote chhunga chinfelsak an tum thu pawh sawiin, khawpui chhunga ramhnuai siamna tur scheme - Nagar Van Scheme chu Municipal neite chauh huam tura duan ni mah se, Environment, Forest & Climate Change changtu Minister TJ. Lalnuntluanga hmalakna zarah Mizoram District zawng zawng te chu huam teltir vek an ni tih Assembly Speaker hi a hrilh bawk.

Comments

Popular posts from this blog

Tukverh-a tlasual boral