Assam Rifle hnathawk tha mi 18 te hnenah Mizoram Governor in chawimawina a hlan

Mizoram Governor Hari Babu Kambhampati chuan nimin khan Assam Rifles sipai 18 te hnenah chawimawina tangkapui leh thuziak a hlan.

Nimin khan 2nd Assam Rifles Bn. chuan Headquarters 23 Sector Assam Rifles leh Headquarters Office of Inspector General Assam Rifles (East) te ruahmanna siam angin Raj Bhavan Circular Lawn-ah Assam Rifles’ Investiture Ceremony-2022 an buatsaih a, he hunah hian Governor chuan Assam Rifles sipai 18 te hnenah chawimawina tangkapui leh thuziak hlanin heng mite hi Governor’s Gold Medal dawngtu mi 11 leh Governor’s Silver Medal dawngtu 7 te an ni a. Heng bakah hian 23 Sector Assam Rifles Bnuaia battalion pahnih - 2 (Lakhimpur) Bn. Assam Rifles leh 8 Assam Rifles te hnenah hnathawk tha chawimawina thilpek a hlan bawk a ni.

Governor Hari Babu Kambhampati chuan Assam Rifles Investiture Ceremony 2022-ah ram venghimtu sipai chhuanawm tak tak 18 in chawimawina an dawng thei chu lawmawm a tih thu sawiin, ram mipui ten India sipai huaisen te kan thlamuanpui a ni, a ti a. Ram venhimna leh ram inpumkhatna atana theihtawp chhuah zel turin Assam Rifles Officer te leh sipai te chu a chah bawk a. Mizoram leh Hmarchhak bial-ah Assam Rifles te chu an awm na a rei tawhin sulhlu tha tak tak pawh an hnutchhiah nual tawh tih sawiin, tunah pawh hian sipai tena ram ralmuan laia an thawh thin, khua leh tui te tana tangkai tak tak – ramri venhim, ruihlo umbona kawnga penchhuah, chhiatrupna lo thlen thulha Civil Administration tanpui bakah hmun kilkhawr a cheng te tih hmasawn hna te Assam Rifles ten tha takin an thawk mek tih a sawi a. Assam Rifles ten mipui rawng an bawlna program pakhat – Civic Action Program hnuaia thingtlang kilkhawr zawka cheng te tana a thlawna Doctor thiam rawnna hun buatsaih thin chu thil tha tak a ni tih sawiin, Mizoram-a ruihlo lo lut tur ven hna pawh Assam Rifles te chuan an thawk tha hle tih a sawi bawk a ni.

Assam Rifles hi India rama Paramilitary Force upa ber a ni a. Investiture Ceremony-ah hian hnathawk tha te chawimawi thin niin he chawimawina hi Sipai huaisen te hnathawh hriatpuina leh tihphurna atan kum 1957 khan Governor of Meghalaya chuan bul a lo tan tawh a. Nimin-a he hun hmanna ah hian Major General Vinod Kumar Nambiar, YSM, SM, Inspector General Assam Rifles (East); Brig. Digvijay Singh, SM, Deputy Inspector General, Hqrs. 23 Sectors Assam Rifles leh Assam Rifles hotute bakah sawmbik mi pawimawh te an tel a ni.