SAY Congress neih tan a ni

India Eastern Territory Salvation Army Youth (SAY) Congress vawi 26-na chu nizan khan Serchhip P&E Veng-a Leisekawt Mual ah neih tan a ni ta.
Naktuk Pathianni zan thleng awh tur SAY Congress vawi 26-na hmang tur hian Palai tam ber te chuan nimin khan Serchhip rawn thlengin nimin tlai thleng khan Counter-a inziaklut Palai 2800 vel an awm a, nizan lam khan rawn thleng tur mi engemaw zat an la awm bakah Counter-a inziaklut lo Palai engemaw zat an awm bawk a ni.

Tun tuma SAY Congress-ah hian thupui atan ‘ Khawvel - Pathian tan’ tih chu hman niin Speaker atan Col. Lalhmingliana, Territorial Commander chu hman a ni a, nizan khan Welcome Meeting neiin vawiin chawhma atang hian Pathian biak Inkhawm neih a ni dawn a, Speaker hnen atang hian Pathian thuchah ngaihthlak thin a ni ang. Zanin dar 9:00 hian Pandal-ah Variety Programme hman a ni anga, naktuk Pathianni zing dar 10:00 atangin Thianghlimna Inkhawm neih a ni dawn bawk a ni.