DTO Office building sawnin karleh ah dawr theih ang

Serchhip-a District Transport Officer (DTO) Office building thar chu nimin atang khan luah tan a ni a, karleh Thawhtanni atangin mipuite tan dawr theih a ni ang.
Cheng nuai 240 vel senga sak Serchhip Darnam Tlang-a Serchhip DTO Office hi a chhawng hnuai Maxi Cab Terminal building ni nghal bawk tura ruahman niin a building hi sak zawh a nih hnuah nimin khan bungrua thiarluh tan a ni a, Serchhip DTO C. Lalawmpuia chuan nimin khan bungrua te hi an thiarlut fel tih sawiin, amaherawh chu hnathawh nan Internet Connection leh thil tul dang hrang hrang buaipui ngai ala awm bakah bungrua te hi remfel te ala tul avangin tunkar chhung chuan mipuite tan dawr theih an ni dawn lo tih a sawi a, harsatna dang a awm loh chuan karleh lamah mipuite tana dawr theih tura an inpeih hman an beisei thu a sawi bawk.

Serchhip DTO chuan an Office building thar hi tunkar-a hawng turin ruahmanna an siam tawh thu leh engemaw rokhawlhna a awm avanga thulh leh rih niin a hawnna neih hun tur hi ruahman leh ala nih loh thu a sawi bawk.

Serchhip Darnam tlang-a District Transport Officer (DTO) Office leh Maxi Cab Terminal building hi Mizopa chhiara chhawng li (4) niin a chhawng hnuai berah Chokidar quarters awmin kawng an hnuai chiah ah Maxi Cab dinna hmun siam a ni dawn a, hetah hian a rualin Maxi Cab 16 vel ding thei tura ruahman a ni a, kawngpui an chu Motor Vehicle Inspector (MVI) Room leh Fee pekna hmun tura ruahman niin a chung ah DTO leh thawktu dang te an awm thung anga. He building sak hna hi CB Construction, Aizawl chuan thawkin kum 2020 November thla khan a sak hna hi thawh tan a ni.

Comments

Popular posts from this blog

Tukverh-a tlasual boral