Chief Minister in Mamit tlawhin hmasawnna hna thawh hrang hrangte a enfiah

Chief Minister Zoramthanga chuan nimin khan Mamit tlawhin sawrkar hmalakna kal mek hrang hrangte a hmunah a enfiah a, Vantlang Inkhawm neih a hmanpui bawk.

Chief Minister Zoramthanga hi Sports & Youth Services Minister Robert Romawia Royte leh Mamit bialtu MLA, Road & Infrastructure Development Board Vice Chairman ni bawk Er. H. Lalzirliana te'n tawiawmin Circuit House leh 100 bedded Hospital leh District Sports Complex siam hmalakna bakah Mamit Multipurpose Indoor Stadium te a hmunah tlawh in a enfiah a. Chief Minister chuan Mamit khaw changtlun zelna tur atana hmalakna hna thawhte chu fakawm a tih thu sawiin, belhchian dawl tak turin thawktu te'n uluk taka an sak a beisei thu a sawi a. Heng hmasawnna ruhrel hrang hrangte hi khawtlang leh a bik takin thalaite hmasawnna tur atana din a nih angin, mipui pawhin a tir atanga neitu rilru pu zel se a ti a ni.

Mamit Circuit House hi June ni 13, 2019 atang khan sak niin, July ni 16, 2021 khan zawh a ni a, cheng nuai 273.34 senga sak niin ram 293.38 metre bial a zau a awh a. Chhawng thum awmin, Basement Floor-ah Dormitory, Dining Hall, Kitchen leh Store a awm a. Ground Floor-ah Reception Area leh Office bakah riahna Room (ordinary) a awm a. First Floor-ah Suite Room (3) leh VIP Room (2) a awm a. Dormitory bakah riahna hi a vaiin 9 a awm a ni.

Mamit-ah hian Sports and Youth Services Department kaltlangin PMJVK atanga sum hmuhin District Sports Complex din hna thawh mek a ni a. A hmunpui tur Bawngva bakah DC Ground-ah Futsal Ground leh Tennis Court pahnih siam tur a ni a, Multipurpose Hall sak a ni bawk a. Chief Minister hian DC Ground a hna kal mek chu a enfiah a ni. Heng bakah hian SYS hnuaia Mamit Multipurpose Indoor Stadium sak mek chu a enfiah bawk a. Hei hi SEDP atanga cheng vbc. 4.62 leh Special Assistance to States for Capital Investment (SASCI) atanga hmuh cheng vbc. 7.88, belhkhawm in cheng vbc. 12.50 hmanga sak a ni.

Mamit-ah 100 Bedded Hospital sak mek hi Power Finance Corporation atanga an CSR hmanga sum hmuh atangin sak mek a ni a, he damdawi In building hi cheng vbc. 17.93 senga sak tur niin CSR Fund atang hian zaa 70, cheng vbc. 12.55 hmuh niin a bak senso chu State sawrkar in a tum dawn a, a sak hna hi Zamzo Engineering, Construction & Consultancy ten an thawk mek a ni. Chief Minister hian nimin chawhnu lam khan Mamit Chhim Veng Branch YMA Hall-a Vantlang Inkhawm neih chu a hmanpui nghal bawk a ni.