Rozgar Mela-ah Mizoram-a thalai 79 te Union MoS in Appointment Letter a hlan
Nimin zing khan Prime Minister hovin Rozgar Mela pualin India ram puma thalai 71000 hnenah Online Video Conference kaltlangin Appointment pekna hun hman niin he hun hi Assam Rifle Loch Hall Aizawl atangin Union Minister of State Ashwini Kumar Choubey hian a hmanpui a, he hunah hian Union Minister chuan Prime Minister Narendra Modi kaihruaina hnuaiah Rozgar Mela hlawhtling taka a kal chho zel thei chu ropui a tih thu sawiin, Aizawl-ah thalai 79 zet hnena amah ngeiin Appointment Letter a pechhuak thei chu lawmawm a tih thu a sawi a. Ram tana thalaite an pawimawh thu leh ram nghahfak an nih thu sawiin, ‘Yuva Shakti-Youth power is Nation power’ tih angin thalai te an chak chuan ram a chak a ni, a ti a. Hna hmu tharte chu kawng engkimah malsawmna dawng tlaka an thawh a ngai a, chumi atan chuan rinawm taka an thawh a ngai a ni, a ti. Prime Minister Modi kaihhruaina hnuaiah hmeichhiate tan hamthatna tam tak a awm thu pawh Union Minister chuan sawiin, Appointment dawng tam tak zinga mi pawh hmeichhia te an nih thu a sawi a. He huna kalkhawmte hnenah eng hna mah hna hnuaihnung a awm loh thu sawiin, kawng engkimah kan ram dah hmasak a pawimawh thu a sawi bawk.
He hun hi Prime Minister Modi hmalakna Rozgar Mela huamchhung a mi niin Mizoram atang mi 79 - Assam Rifle-ah 62, BSF-ah 12, SSB-ah 4 leh Indian Overseas Bank-a hna hmu thar mi pakhat hnenah Appointment Letter hlan a ni.
Union Minister of State for Consumer Affairs, Food and Public Distribution leh Environment, Forest and Climate Change Ashwini Kumar Choubey hi nizan hmasa khan Raj Bhavan-ah Mizoram Governor Hari Babu Kambhampati nen inkawmin Governor hian Union Minister chu Mizoram-ah a lo lawm tih a sawi a, Mizoram chhunga Official Program hrang hrang a hmanna ah te State Official te nen Mizoram hmasawnna tura ruahmanna tha tak tak siam turin duhsakna a hlan nghal bawk.
Mizoram Governor chuan Union MoS hnenah hian Mizoram dinhmun tlangpui te, Mizoram a hmasawnna ruhrel lian zual deuh thawh mek te leh hun reilote a thawh tur chi Project liantham deuh chanchin tlangpui a lo hrilh hmasa a. Union MOS nen hian sawrkar hmalakna pawimawh dang te pawh an sawi dun nghal bawk.
Hei bakah hian Mizoram Governor chuan National Institute of Technology (NIT) Mizoram sakna tur hmunhma a la fel theih loh thu pawh sawiin, Union MoS for Forest and Climate Change chu NIT sak hna thawh thuai a nih theih na tura Forest Clearance chingfel turin a ngen nghal bawk.
Comments
Post a Comment