PMGSY hnuaia hmalakna thlirletna neih a ni

Nimin khan Chief Minister Zoramthanga hovin Pradhan Mantri Gram Sadak Yojana (PMGSY) Review Meeting neih a ni a, he Scheme hnuaia State chhunga kawng siam hna thawh mek leh hmabak awm te sawiho a ni.

CM Office Conference Hall-a he thutkhawm neiha tarlan a nih danin PMGSY hi kum 2000 atang khan ram pumah kalpui a ni a. Mizoram-ah chuan Mizoram PWD chu Executing Agency niin meeting-ah hian PMGSY-I leh PMGSY-II hnathawh chipchiar taka thlirho a ni a, tun dinhmunah khaw 231-ah kawng 297, belh-khawmin KM 4238.29-a thui siam a ni tawh a. Ministry of Rural Development hnena sum mamawh thlen a nih dan te tarlan a ni bawk. Hei bakah hian State leh National Level-a kawng siam hna that leh that loh endikna, State Quality Monitors leh National Quality Monitors chungchang sawiho ni bawkin, Quality Monitoring hi uluk leh zuala kalpui ni se tha an tih thu an sawi bawk.