Tualbung khaw kum 100 tlin lawmna neih a ni

Saitual District chhunga Tualbung khua in kum 100 tlin lawmna an neih chu Assembly Speaker Lalrinliana Sailo leh P&E Minister R. Lalzirliana te chuan an hmanpui.

Tualbung khaw kum 100 tlin lawmna hi nizan hmasa khan a bultanna Tualbung Tahreuh kawn-ah neih niin Assembly Speaker Lalrinliana Sailo chuan a hmanpui a, Tualbung Community Healthcare Scheme chu tlangzarhin Tualbung khua in Health Care Scheme tha leh felfai tak mai ngaihtuah nachang an hria chu ropui a tih thu sawiin, khaw dangte tan pawn entawntlak tak an nih thu a sawi a. A bial chhungah ngei Health Care Scheme tha tak a hawng thei chu a lawm thu leh MLA a nih chhung chuan buaipui leh enzui pui reng a inhuam thu sawiin, he Scheme atan hian cheng nuai khat a hlan nghal a. Tualbung khuaa kum 70 chung lam mi 47 te hnenah blanket a hlan bakah Centenary lawmna leh Hall sak zawmna atan cheng nuai hnih a pe bawk.

Tualbung khaw kum 100 tlin lawmna hi nimin khan neih leh niin P&E Minister R. Lalzirliana chuan a hmanpui ve leh a, a pianna khua Tualbung in kum 100 a tlin lawmna a hmanpui thei chu a lawm thu sawiin, Tualbung khua chu rambuai hma atang tawh pawhin khaw taima leh thawkrim, mahni a intodelh leh midangte pan buai ngai lo an ni, a ti a. Mizoram in zalenna a sual laia Tualbung inkahna thlenna hmun Pholeng tlang chu Ministry of Culture hnuaia ‘Financial Assistance for Tagore Cultural Complexes’ hnuaia chei that turin hmalak mek a nih thu Art & Culture Department changtu ni bawk R. Lalzirliana chuan a sawi bawk.

Tualbung khua hi Pawihbawiha Sailo hovin kai a ni a, rauhsan a nih hnuah a fapa Thangkama Sailo hova luah leh a ni a, heng hunlai hi kum 1890 vela ngaih a ni. Tuna Tualbung khua in kum 100 tlin an lawmna hi Tiluia Sailo in kum 1921-a Tualbung a kai leh champha hriatrengna atana hman niin hri leng avangin a hun takah hman theih erawh a ni ta lo thung a ni.