PMAY (U) District Screening Committee in tanpuina dawng zui thei lo turte chungchang an ngaihtuah

Nimin khan Pradhan Mantri Awas Yojana (Urban) hnuaia District Screening Committee chu Serchhip-ah thukhawmin PMAY (U) hnuaia tanpuina dawng tura thlanchhuah, chhan engemaw avanga tanpuina dawng thei lo turte chungchang ngaihtuahin mi 23 te chu tanpuina dawng thei tur atanga paih an ni.

He thutkhawm Serchhip DC Meeting Hall-a neih hi an Chairman leh District Bawrhsap Nazuk Kumar IAS chuan a kaihruai a, he thutkhawm hi Tuikum bialtu MLA leh Assembly Deputy Speaker Er. Lalrinawma chuan hmanpuiin PMAY(U) chu In nei lo ten In an neih theihna tura tanpuina Scheme a ni tih sawiin, he Scheme hian mi harsa te tanpuina atana sum pek chu a tum ber a nih loh thu leh In an sak ngei ngei chu he Scheme hi a tum a ni tih kan hriat a ngaih thu a sawi a. Tanpuina dawng tawh te pawhin tanpuina kan dawn rual hian In sak ngei ngei chu kan mawhphurhna a ni tih kan hriat a ngai tih sawiin, tanpuina sum hmang dik lo an awm a nih chuan State Level Committee thlenga thlen a tul nia a hriat thu a sawi bawk.


UD&PA Department-a thawktute chuan In sak tanpuina dilna thehluh laia In hmun nei nia insawi, a hnua In hmun nei leh si lo an awm thin thu sawiin, hei bakah hian In sak tanpuina dawng tawh, In sa leh si lo leh an sum dawn pawh a hmanna tura hmang lo an awm thu sawiin, heng mite hian tanpuina an dawn hmaa intiamkamna an lo ziak tawh angin an sum dawn te rul leh tura thin mek te pawh an neih thu an sawi a ni.

Nimin-a District Screening Committee thutkhawm ah hian PMAY (U) hnuaia Serchhip tana 1st DPR-ah tanpuina dawng tura thlan tawh mi 10 leh 3rd DPR-a mi 6 te; North Vanlaiphai tana 1st DPR-ah mi 3 leh 2nd DPR-ah mi 3 bakah Thenzawl tana 2nd DPR-ah mi pakhat; an vaiin mi 23 te chu an dinhmun leh khawsak dan hrang hrang te zirchian an nih hnuah PMAY (U) hnuaia tanpuina dawng tura thlan an nih tawhna titawpin paih tura rel a ni.

Heti hian Serchhip tana 1st DPR-ah a tirah tanpuina dawng tura mi 1013 thlan-chhuah niin nikum-a District Screening Committee in mi 54 a paih tawh bakah tuna mi 10 paih an nih leh tak avangin tanpuina dawng tur hi mi 949 an ni dawn ta a. 3rd DPR Ser-chhip-ah a tira tanpuina dawng tura thlan mi 589 atangin nikum a District Screening Committee in mi 17 te a lo paih tawh bakah tun tumah hian mi 6 paih leh an nih avangin tanpuina dawng tur hi mi 566 an ni dawn ta a ni.

North Vanlaiphai khua tana 1st DPR-ah a tirah tanpuina dawng tura thlan mi 349 niin nikum lamah District Screening Committee in mi 13 paih tawhin tunah hian mi 3 paih leh an nih avangin tanpuina dawng thei tur hi mi 333 an dawn ni ta a. North Vanlaiphai 2nd DPR-ah a tira tanpuina dawng tura thlan mi 206 niin nimin-a District Screening Committee in mi 3 an paih tak avangin tanpuina dawng tur hi mi 203 an ni dawn ta bawk a ni.

Thenzawl khaw tana 2nd DPR-ah a tira tanpuina dawng tura thlan mi 296 awmin kumin khan District Screening Committee in mi pakhat a paih bakah nimin khan mi pakhat paih leh an nih avangin tanpuina dawng thei tur hi mi 294 an ni dawn ta bawk a ni.

Heng khaw hrang hranga tanpuina dawng chhunzawm theilo te hi anmahni an inhnuhdawh vang a ni tlangpui a, hei bakah hian Pem avanga dawng zui thei lo leh tanpuina dawng tur a thih avanga paih te an ni a, hei bakah hian ram neih loh avanga In sa thei lo te pawh awmin In sak tanpuina semchhuah khaihlak chungchang te pawh he hunah hian sawiho a ni bawk.

Comments

Popular posts from this blog

Tukverh-a tlasual boral