Grape Wine zawrh tum tam

Mizoram sawrkarin dan hnuaiah Grape Wine zawrh a remtih tak avangin zawrh diltu (Vendor license)-te dilna chu enfiah mek a ni.

Excise & Narcotics Department thawktute hnen atanga thudawn danin Grapewine zawrh diltu hi an thahnem hle a, phalna hi Aizawl leh District khawpui dangah pek theih a nih avangin tunah hian enfiah hna thawh mek a ni. Dan hnuaiah grape tui hi zawrh tur ni mah se Sakhaw puipunna hmun hnai leh zirna In bulhnaiah zawrh phal a nih loh avangin tuna diltu tam tak hi chuan an zawrh theih a rinawm loh niin an sawi bawk. Excise & Narcotics Department thawktute chuan Vendor license chu tihfel ran an tum nia sawiin, zuar thei tur zat bithliah erawh a awm lem lo niin an sawi a. Vendor license diltu hi Aizawlah ringawt pawh mi 200 chuang an awm niin an sawi bawk.