Serchhip District-a Bank te CD Ratio sang zelin kum khat chhungin 11% chuangin a sang

Serchhip District chhunga Bank hrang hrang ten September 2022 Quarter tawp thlenga sum an dawn atanga Loan an pekchhuah Credit Deposit (CD) Ratio chu 65.91% a ni a, kum khat chhunga Quarter tinah CD Ratio hian san lam panin kum khat chhungin 11.5% velin a sang chho hman a ni.

Nimin khan Serchhip DC Meeting Hall-ah Serchhip District chhunga Bank hrang hrangte hmalak dan leh an hnathawh dan te thlirin District Consultative Committee (DCC)/District Level Review Committee (DLRC) thutkhawm chu an Chairman leh District Bawrhsap Nazuk Kumar IAS hovin neih a ni a. He thutkhawm ah hian June 2022 Quarter tawp-a Bank hrang hrang hmalak dan leh chumi hnu September 2022 Quarter tawp-a an thlen chin te thlirho niin Bank ten mipuite hnen atanga sum an dawn atanga Loan an pekchhuak khaikhinna, Credit Deposit (CD) Ratio chuan san lam a pan zel tih tarlan a ni a. Nikum (2021) September thla tawp Quarter-ah khan CD Ratio hi 54.41% a nih laiin December 2021-ah hian 58.02%-ah a kai a, kumin (2022) March Quarter-ah chuan 63.11%-ah kai lehin June thla tawp-ah khan 64.36% a ni leh a, tun September thla tawp Quarter-ah chuan 65.91% ni lehin kum khat chhung hian 11.5% in a sang tawh a ni.

He huna tarlan a nih danin Serchhip District chhunga Bank hrang hrang ten Septembet thla tawp Quarter thlenga sum an dawn chu cheng nuai 44846.20 niin Loan an pekchhuah chu cheng nuai 29561.29 a ni thung a, Serchhip District-a Bank Branch hrang hrang 16 awm zingah CD Ratio 40% tling lo hi Branch 5 an awm a, heng zing pahnih te hi Serchhip khawpui chhunga mi te an ni a, Loan pechhuak lo an awm lo a ni.

He huna tarlan a nih danin kumin September thla tawp Quarter thleng khan Pradhan Mantri MUDRA Yojana (PMMY) kaltlangin Rs. 50,000/- thleng Loan lak theihna Shishu hnuaiah mi 98, Rs. 50,000/- atanga cheng nuai 5 thleng Loan lak theihna Kishore hnuaiah mi 172 leh cheng nuai 5 atanga nuai 10 thleng lak theihna Tarun hnuaiah mi 37, an vaiin mi 307 te hnenah Loan cheng nuai 622.82 pekchhuah tawh a ni a. Pradhan Mantri Jan Dhan Yojana (PMJDY) hnuaia inziaklut mi 18,734 awm tawhin, Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PM-SBY) leh Atal Pension Yojana (APY) hman tangkai a nih dan leh an hmalakna hrang hrangte pawh he hunah hian thlirho a ni bawk.