CM in Keilungliah Dam Reservoir a tlawh

Chief Minister Zoramthanga chuan nimin khan Champhai khawpui kianga lui luang Keilungliah-a tuikhuah mek, Keilungliah Dam Reservoir chu a tlawh.
Keilungliah tuikhuah hi 'Dam Reservoir and Development of Recreation Centre at Keilungliah' tih niin project hi cheng nuai 1,988 a ni a, Non-Lapsable Central Pool of Resources, NLCPR (DoNER) kaltlangin M/S S.S Construction ten an thawk mek a, he tuikhuah hi Champhai khawpui tui mamawh leh Thal laia kuthnathawktute tui mamawh phuhruk nan te, lenkhawthawnna leh khual hip nan te, Sangha khawia eizawnna tihhmasawnna nan te, khawpui timawitu leh sik leh sa tinuamtu atante a ruahman a ni a. Tuikhuah zawhfel anih hnua enkawl zui zelna tur leh Line Department kaltlanga hmalak theih dan turte pawh ngaihtuah chhoh mek zel a ni bawk. He hna hi kum 2018 khan bultan niin March 2020-a zawh tur ni mah se rokhawlhna a awm avangin kum hnih (2) atan pawhsei sak an ni a, tunah hian hna thawh tur za zela 98 (98%) vel zo tawh anga chhut niin tuikhuah hian meter 930 a thui chim thei tura ngaih a ni.