Serchhip District-a Zirlai naupangte eitur tha pekna tur leh Sports zirna kalpuina tur Minister in a hawng

School Education Minister Lalchhandama Ralte chuan Serchhip District chhung thingtlang khuaa ‘Free Morning Nutrition Programme for School Children’ kalpui tur leh Pilot Project-a ‘Grassroots Level Sports Development Programme’ kalpui turte chu nimin khan Serchhip-ah a hawng.

Heng Programme pahnih hawnna puala inkhawm tawi BRC Hall, Serchhip-a neih ah School Education Minister Lalchhandama Ralte chuan heng Programme pawimawh tak tak pahnih khuhhawnna nei tura ruahmanna tha tak siam a ni chu lawmawm a tih thu sawiin, kumin July 26 khan Sri Sathya Sai Annapoorna Trust, Bangalore te nen thla kua (9) chhung atan ‘Free Morning Nutrition Programme for School Children’ kalpui tura thawhdunna an lo ziah tawh thu sawiin, a bultanna atan District pahnih, Serchhip leh Hnahthial te thlan an nih thu a sawi a. Sawrkar School hrang hrangah naupangte chu Mid-Day Meal pek mek an ni tih sawiin, amaherawh chu naupang tam takin an puarna khawp chawtha an hmu kim lo nia hriatna a awm avangin leh khawvel changkan ang zela India a changkan theihna turin naupangte chu than dan dik neia an thana; he ram leh hnam tana hman tlak lehzuala chherchhuah an nih theih nan he ruahmanna hi a enchhinna atan heng District pahnih ah hian kalpui a nih dawn thu a sawi a. Naupangte tan hian chawtha, SaiSure leh T-Special (Milk Powders) pek tur ruahman a nih thu leh heng te hi naupangte hnena pek an nih hmain an taksa dinhmun enfiahin, thla thum an ei hnuah an dinhmun te enfiah leh a nih tur thu a sawi a. Hetiang chawtha kan naupang ten an ei ve thei tawh tur chu lawmawm a tih thu a sawi bawk.

Education Minister chuan kumin October 12 khan Grassroots Level Sports Development Programme (GSDP) chu State Level-ah hawn a nih tawh thu sawiin, State pum huap Sports Association panga (5) te nen a thawh khatna atan thawhhona an siam thu leh tun Academic Session-ah hian Centre 40-ah kalpui a nih dawn thu a sawi a. National Education Programme (NEP-2020) ah Sports chu ngaih pawimawh a nih tawh bakah State sawrkar pawhin Sports chu Industry-ah puangin, naupangte chu Grassroot atanga chherin zirna School piah lamah talent nei te zawnchhuaha eizawnna an neih theihna turin he hmalakna hi kalpui a nih dawn thu a sawi a. Tun tumah hian Centre pakhat-ah cheng nuai 2 vel pe in Coach leh Asst. Coach ruaiin kum 2023-2024 Academic Session-ah chuan tam zawk leh lian zawka kalpui tum a nih thu a sawi bawk.

Heng Programme tlangzarhna puala inkhawm hi Serchhip District Education Officer leh Samagra Shiksha-a DPC Lawmawma chuan kaihruaiin Serchhip SDEO leh Samagra Shiksha-a Addl. DPC Vanlalchhana chuan heng Programme kalpui dan turte a tarlang a. ‘Free Morning Nutrition Programme for School Children’ atan hian District chhunga thiangtlang khua ah naupang 2000 thlanchhuah an nih tur thu a sawi.

Grassroots Level Sports Development Programme (GSDP) hnuaiah hian Serchhip District-a zirna In pathum-ah Centre pakhat theuh, a vaiin Centre pathum hawn a nih dawn thu sawi bawkin, heng te hi Govt. Chhiahtlang M/S-ah Football, Govt. New Serchhip M/S-ah Weight-lifting leh Baktawng M/S-ah Hockey te a nih thu a sawi a. Heng Centre tinah hian naupang 30 zel thlan tur niin kum 6 leh 14 inkar te tan a ni dawn a, mi 30 zinga 5 te hi Hmeichhia an ni ngei ngei tur a ni bawk ang.