MJA ten DTO an kawm
Nimin-a Serchhip DTO an kawmna hunah hian MJA Serchhip District hruaitute chuan Journalists te sawrkar leh mipuite inkara awm leh a tul huna Palai hna thawk thin an ni tih sawiin, Serchhip-a Sawrkar Department hrang hranga Officer leh thawktu dang ten Serchhip-ah hrehawm ti lovin mipuite tan nuam ti takin, thahnem ngai takin hna thawk se an duh thu an sawi a. Tunhnaia Social Media lama Serchhip DTO Office chung-chang sawi neuh neuh awm chu pawi an tih thu sawiin, insiamthat ngaihna lai a awm a nih chuan insiamthat a tul thu sawiin, mipuite pawhin heng thil thleng nia sawi ah hian thudik an hriat ve a tul nia an hriat thu an sawi bawk.
He hunah hian Serchhip DTO C. Lal-awmpuia chuan Serchhip-ah hun rei ala awm loh thu sawiin, tunhma lamah Serchhip DTO Office chungchangah thu ngaihnawm loh tak tak a lo awm fo tawh thin tih a hriat avangin heng te hi siamtha tura theihtawp chhuaha hma an lak ve thu leh mipuite tan theihtawp an chhuah ve thu a sawi a. Chutih kara thu dik lo Social Media lama thehdarh a ni thin chu pawi a tih thu sawiin, tunhnaia Dan bawhchhia Maxi Cab man a nih chungchang te, District dang tan Serchhip-ah License an pekchhuah tawh loh avanga Social Media-a thu thehdarh awm chungchang bakah Social Media lama thil thleng ni sawi thenkhat te chu thu diklo a nih thu a sawi a ni.
Serchhip DTO chuan thawktu indaih-lohna avanga harsatna an tawh te pawh he hunah hian sawiin, Serchhip Darnam Tlang-a DTO Office building tur an sak mek pawh peihfel thaw-khat a nih tawh thu a sawi a ni. Serchhip DTO Office-a thawktute chuan Serchhip DTO Office atanga Motor Registration an pek hnuhnung ber chu Mz-06-A/1662 a nih thu an sawi bawk.
Comments
Post a Comment