Latest News

Imphal - Aizawl Alliance Air Service hawng

Imphal (Manipur) leh Lengpui (Mizoram) inkara thlawk tur Alliance Air Service chu nimin khan biakhmuh theihna hmangin Union Civil Aviation Minister Jyotiraditya Scindia chuan a hawng.

Alliance Air Service hawnna hunah hian Union Minister Civil Aviation Jyotiraditya Scindia chuan Act East Policy kalpui mek ah hmarchhak State leh Central te inkalpawhtawnna chu changtlung zawka siam chhoh zel tum a nih thu sawiin, ram dangte nena inkalpawhna tur International Service atan pawh hmalak zel a nih thu a sawi a ni. He hun hi Chief Secretary Video Conference Room atangin Mizoram sawrkar aiawhte pawhin Tourism Minister Robert Romawia Royte hova lo hmanpuiin Tourism Minister chuan Mizoram chu India hmarchhak kil tawp a awm anih avangin Lei lam leh vansang lama inkalpawhna tha neih a pawimawh zual bik tih a sawi a, Imphal leh Aizawl inkara Alliance Air service thar hawn a ni chu lawmawm a tih thu sawiin, Manipur leh Mizoram mipuite inkara inpawhtawnna atan te, Economy bakah Tourism tihhmasawnna atan a pawimawh hle dawn a ni, a ti bawk.

Alliance Air Service thar hi Imphal leh Aizawl inkar ah kar khata ni nga (5) service tura ruahman a ni a, hemi rual hian Hmarchhak State hrang hrang Assam, Manipur, Arunachal Pradesh, Meghalaya-ah te pawh Thlawhna service thar hi hawn nghal niin Mizoram atangin Tourism Minister bakah Lok Sabha MP C. Lalrosanga leh Principal Consultant Civil Aviation  Mizoram J. Lalhmingliana leh Alliance Air aiawh te an tel bawk a ni.

Comments

Popular News (Last 30 Days)