Vawiin atanga Mizoram luhna kawngpui Kolasib District-a danpin tum thulh lailawk a ni

NHIDCL ten Fourlane laih an tumna a ram neitu, Land Owners Association Kolasib District ten zangnadawmna an lak tur an lak thuai theih nana nawr nan Vawiin atanga NH. 306 kawngpui dan an tum chu Kolasib DC John LT. Sanga hova meeting an neih hnuah thulh rih an remti a, tun thla ni 31 thleng Sawrkar an ngaichang dawn.

Fourlane laih tur atana ram neitu (Land Owners) te lungawilohna chungchangah hian Kolasib District Bawrhsap chuan nimin khan Land Owners hruaitute hi DC Conference Hall-ah kokhawmin an lungawilohna neih te a ngaihthlak sak a. Land Owners’ hruaitute chuan NHIDCL-in Four Lane an laih dawn avang hian an ram pass chhuhsak an ni tawh a, kum 2 zet an huan lo ram chhungah hma an lak theih tawh loh avangin harsatna an tawk mek niin an sawi a. NHIDCL ten ram an lakah zangnadawmna pawisa pawh Central sawrkarin a release vek tawh nia sawiin, tunah hian NHIDCL leh CALA te Joint Account-ah a awm vek tawh bakah sawrkar thuneitu sang GAD Meeting pawhin zangnadawmna semchhuak tura phalna a pek vek tawh laia tun thlenga an la dawng thei lo chu hriatthiam harsa an tih thu an sawi a. An harsatna tawhah an thiam ang tawkin hma an la tawh a, a kaw tawpah an tang ta nia hriain kawngpui dan chah chu chak lo tak chunga kalpui an tum thu an sawi a ni.

Kolasib District Bawrhsap chuan compensation sum kawl reng chu an duhloh thu leh a rang thei ang bera a dawngtute hnena pek an duhthu sawiin, amaherawhchu September 6, 2022 khan NHIDCL lamin compensation hi pechhuak lo turin an rawn hrilh tih a sawi a. Compensate tur sum a luh vek tawh hnuah pawh an sem theih loh chhan ber chu NHIDCL lamin Forest land leh Revenue land chinfel a nih hma chuan sum pe chhuak rih lo tura an tih vang a nih thu a sawi a. Mipui harsatna a nasat zel avangin kar kalta Inrinni khan Forest Minister hovin Kolasib DC, Addl. DC, NHIDCL leh sawrkar Official te pawhin hemi chungchang hi an sawiho tawh a, harsatna awm te chingfel thuai turin Minister hian a hriattir tih a sawi bawk.

Hei bakah hian NHIDCL te hian he kawng laih tur atan hian Forest Clearance hi an dil mek a, Clearance hi 'Parivesh Portal' atangin dil tur ni mahse he portal hi tunah upgrade mek a ni a, hei vang hian dilna process pawh a kal thei hrih lo niin a sawi a. “Mizoram Level-a sawi theih a awm tawh lova, NHIDCL, Delhi-ah ball a awm tlat tawh,” tiin Land Owners hruaitute pawh Mizoram sawrkar tihtheih phak bak a nih tawh vangin lungawilohna lantira kawngpui dang lo turin a ngen a. NHIDCL te hian Forest Clearance an dil rualin Net Present Value (NPV) leh Compensatory Afforestation (CA) an pek a ngaih thu tarlan a ni bawk.

Land Owners hruaitute hian DC ngenna hi sawiho ve lehin, DC ngenna angin lungawi lohna lantira kawngpui dan an tum chu an thulh rih thu an sawi a, October thla chhung ngaihchan nise, hemi hnu thlenga thu lawmawm an hre lo a nih chuan an thiam dan anga hmalak an tum thu an sawi bawk.

NHIDCL te hian Delhi lama an hotuten pawisa sem phalna an pek chuan compensate hi sem mai theih a nih thu a sawi bawk a ni.