'Mizo Tawng Ziah Dan' lehkhabu tlangzarh a ni

Mizoram Board of School Education (MBSE) buatsaih 'Mizo Tawng Ziah Dan' Fourth Edition 2022, (Revised & Enlarged) chu nimin khan School Education Minister Lalchhandama Ralte chuan a tlangzarh.

MBSE Conference Hall, Chaltlang-a he lehkhabu tlangzarhna hunah hian Education Minister chuan Mizo tawng ziah dana tute pawhin an rawn theih tur lehkhabu tha tak 'Mizo Tawng Ziah Dan' tihchhuah a ni leh ta chu lawmawm a tih thu a sawi a. MBSE hnathawhin hma a sawn zel a, mipui beiseina pawh a lian chho zel tih a sawi a. Mizo mipuiin an laka rinna an nghah zel theih nan fimkhur tur te, an hna theuh thiam tha tur te leh thuruk vawn kawngah te pawh rinawm turin a sawm a. MBSE hnuaia Mizo Language Committee (MLC) chu ram leh hnam tan Mizo tawng ziah dan tihhmasawn kawngah tan la zel turin a sawm bawk.

Education Minister chuan Human Resource Development hnuaiah Language Development Board din a nih thu leh February, 2022-ah Assembly pawhin a pawm tawh thu sawiin, a takin hna la thawk lo mah se, hnathawhna tur dan leh hrai te, an Office tur leh mamawh chi hrang hrang buaipui mek a nih thu a sawi a. Hripui leng avanga India leh khawvel pum a buai vanglai pawhin MBSE-in a hun takah Board Exam an buatsaih a, result pawh a chhuah hun dik takah an tichhuak thei chu chhuanawm a tih thu pawh Minister chuan sawiin, ram tana an hnathawh hi lian tak a ni a, hetianga ti ve thei state dang an awm lo a ni, a ti.

He hunah hian MBSE Secretary Sarah Lalengzami Pachuau chuan MBSE hnuaia Mizo Language Committee chuan kum 16 chhung zet Mizo tawng tihhmasawn kawngah hma a lak thu te, tuna lehkhabu an tihchhuah pawh an kutchhuak anih thu leh chhut vawi 4-na anih mai bakah ennawna tihlen anih thu a sawi a. MBSE-in tawng pahnih Mizo tawng leh Sap tawnga ziah 'bilingual textbook' Science leh Mathematics chu buatsaih mek a nih thu leh tun atanga rei vak lovah zawh theih mai an beisei thu a sawi bawk.

Lehkhabu tlangzarh inkhawm hi MBSE Chairman JH. Zoremthanga chuan kaihruaiin MBSE-in Mizo tawng ziah dan lehkhabu an tihchhuah chu sawrkarin a pawmpui awmchhun a nih thu a sawi a. Mizo Language Committee Convener Prof. R.L.Thanmawia chuan lehkhabu kalphung leh buatsaih dan sawiin, lehkhabu chu hlawm hnih, thumal ziah zawm tur leh zawm loh tur sawi chianna leh tute pawhin an rawn theih tur dictionary anga hman theih thumal ziah zawm chi leh zawm loh chi dahkhawmna a ni tih a sawi. MLC ten Mizo tawng ziah dan lehkhabu an lo tihchhuah tawhte chu Bible lehlinna atan hman nghal zel niin, MZU a Mizo Department pawhin an zui nghal zel thu a sawi bawk.