MNF Party hi din a nih tirh atangin Pathian a innghat tlat a ni - Zoramthanga

MNF President Zoramthanga chuan MNF Party chu din a nih tirh atangin Pathian a in nghat tlat a ni tih sawiin, “Pathian leh kan ram tan tiin a lungphum pawh phum a ni,” a ti.

MNF Diamond Jubilee kharna inkhawm Inrinni-a Aizawl Vanapa Hall-a neih ah MNF President hian MNF Party chu Laldenga hova din a nih tirh atangin Pathian a innghat tlat a nih thu leh ‘Pathian leh kan ram tan’ tiin a lungphum pawh phum a ni tih hi sawiin, chu lungphum chu tun thlengin chawhnun zel a la nih thu a sawi a, “Kan fel bik vang emaw, kan that bik vang emaw ni lovin Pathian leh kan ram tan tia kan din tlatna hi kan felna ah ruat sak kan ni,” a ti bawk. MNF President chuan China atanga hruai chhuaka helai hmuna min dah hian chhan a nei tih pawh sawiin, “He ram-a min dah chhan hi Pathian in a chanchintha hril tira min duh vang a ni,” a ti a. “Pathian in Mizote hmangaih taka min hruaina zawng zawng hi MNF that vang emaw, Congress that vang emaw a ni lo a. Van-a a lawn dawna Isua’n min chah, chanchin tha hril tura he hnam hi min duh vang a ni,” a ti.

MNF Vice President Vanlalzawma kaihhruai he hunah hianMNF Senior Vice President Tawnluia pawhin Silai, Bomb leh Jet Fighter hmanga beih a ni chunga Diamond Jubilee an lawm thei chu Pathian hnenah lawmthu an sawi thu a sawi a, “Pathian hruaina liau liaua he hun hi thleng kan ni a. He party hi Pathian in min hruai zel theih nan thil tha tiin a hnenah i inhlan thar ang u,”tiin mipui kalkhawmte a chah bawk.

MNF Diamond Jubilee hi October ni 22, 2021 khan hawnna hun hman a ni a, kum khat chhung kawng hrang hranga a lawmna hun hman a nih hnuah Inrinni khan a kharna hun hi hman a ni a. Inrinni zingkar-ah khan MNF President Zoramthanga chuan Mission Veng South-a C. Rochhinga In kawt-ah 'Independence Puanna Hmun Hriatrengna Lungphun' hawnna a nei a, Lungphun hawnna hmun hi March ni 1, 1966 zanlai-a MNF-in Independence puanna hmun kha a ni. He hunah hian MNF President chuan India ram-a Mizoram a beh dan te sawiin, silai kenga zalenna sual a ngaih tak dan leh remna thuthlung ziah a nih dan te a sawi a, “Independence chu kan duh ber a nih laiin Special Protection hnuaia kan awm hi chanchin tha hrilna remchang zawk a ni,” a ti bawk. MNF Diamond Jubilee Celebration Committee buatsaihin Diamond Jubilee Lungphun hawnna hi Phunchawng dai, Sairang Road-ah MNF Sr. Vice President Tawnluia hova neih niin Melthum-ah MNF Vice President Vanlalzawma, Selesih-ah MNF Vice President Lalthlengliana leh Zemabawk-ah MNF Treasurer K. Vanlalauva-te hova neih a ni bawk.