Kumin June 18 hnu lama a vawi khatna atan Serchhip District-ah COVID-19 hri kai enkawllai awm rih lo

Kumin June 18 hnuah Serchhip District-ah COVID-19 hri kai enkawllai an awm lo leh ta a, nimin khan Serchhip District-a COVID-19 hri kai enkawllai mi pakhat chu amah enkawlna hmun atanga chhuahtir niin COVID-19 hri leng hian ziaawm lam a pan zel niin a lang.

Serchhip CMO Office atanga thu kan dawn danin Mizoram-a COVID-19 hri leng in ziaawm lam a pan rualin Serchhip District-ah pawh hri leng hian ziaawm lam a pan zel niin a lang a, tun thla ni 13 hnu lamah Serchhip District-ah COVID-19 hri kai hmuhchhuah belh awm rih lovin hri kai hmuhchhuah hnuhnung ber, East Lungdar khua a mi chu nimin khan amah enkawlna hmun atanga chhuahtir a ni ve leh a, heti hian nimin tlai atang khan Serchhip District-ah COVID-19 hri kai enkawllai an awm ta rih lo a ni.

Serchhip District-ah hian September 7, 2020 atangin COVID-19 hri kai hmuhchhuah hi nasa taka pungin January 20, 2021 thlengin hri kai hmuhchhuah an ni a. Hemi hnu hian hri kai hmuhchhuah awm lo rengin April 8, 2021-ah hri kai hmuhchhuah an ni leh a, hemi hnu hian hri kai hmuhchhuah hi nasa taka pung chho zelin kumin June 17 khan hri kai enkawllai an awm lo ta chauh a. Amaherawh chu kumin June 19-ah hri kai hi hmuhchhuah belh leh niin hri kai enkawllai an awm leh ta reng a, nimin attang khan hri kai enkawllai hi an awm lo ve leh ta a ni.

Kum 2020 March thla vel atanga COVID-19 avanga harsatna a thlen hnuah Serchhip District-a COVID-19 hri kai hmuhchhuah hmasak ber chu June 9, 2020 khan hmuh a ni a, Serchhip District atang hian Sample 85,346 enfiah ni tawhin COVID-19 hri kai mi 14,605 hmuh an ni tawh a, hri kai zinga mi 14,569 te chu enkawl dam niin hri kai atanga chhutin za zela 99.75 te chu enkawl dam an ni a, hri kai zingah mi 36 boralin hri kai hmuhchhuah atanga chhutin za zela 0.24 te chu an boral a ni. Serchhip District-a COVID-19 hri kai hmuhchhuah zingah hian Rapid Antigen Test hmanga hri kai hmuhchhuah tam berin Rapid Antigen Test hmanga Sample enfiah 70,053 atangin COVID-19 hri kai mi 13,084 hmuhchhuah an ni a, TrueNat Laboratory-ah Sample 9572 enfiah niin hri kai mi 826 hmuh an ni a, RT-PCR Laboratory-a Sample enfiah tura thawn tawh 3330 atangin hri kai mi 135 hmuh ni bawkin FIA hmanga Sample enfiah 2391 atangin COVID-19 hri kai mi 560 hmuhchhuah an ni bawk a ni.

Serchhip District-a COVID-19 hri kai hmuhchhuah zingah hian kum 18 hnuailam mi 5050 zet awmin hri kai hmuhchhuah atanga chhutin za zela 34,57 a tling a, kum 18 - 29 mi 3007 awmin kum 30 - 40 mi 2316, kum 41 - 50 mi 1627, kum 51 - 60 mi 1110, kum 61 - 70 mi 728, kum 71 - 80 mi 477, kum 81 - 90 mi 163 leh kum 91 leh kum 100 inkar mi 26 bakah kum 100 chunglam mi pakhat a awm bawk a. COVID-19 hri kai 14,605 zinga a zatve aia tam mi 7390 te hi COVID-19 Vaccine la lo niin hei hi hri kai hmuhchhuah atanga chhutin za zela 50.59 an ni a, Vaccine Dose 1-na la mi 663, Dose 2-na la mi 6428 leh Dose 3-na la mi 124 an awm bawk.

Serchhip District chhunga COVID-19 hri kai boral mi 36 zinga a tam zawk, mi 26 te chu COVID-19 Vaccine la lo an ni bawk a, hei hi hri kai boral atanga chhutin za zela 72.22 an tling a, Vaccince Dose 3-na thlenga la zingah nunna chan awm lovin mi 9 te chu Dose 2-na thlenga la leh Dose 1-na chauh la mi pakhat an awm bawk.

Serchhip District-a COVID-19 hri kai boral mi 36 zinga 19 te hi ZMC-a boral an ni a, Dedicated Covid Care Centre (DCHC) boral mi 8 awmin In lama enkawl (Home Isolation) zingah mi 8 an boral bawk a, Covid Care Centre (CCC)-a boral mi pakhat a awm bawk a, kumin August 28 hnuah hri kai zingah boral awm tawh lo bawkin heng hri kai boral te hnenah hian Ex-Gratia pek an ni bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man