SEDP dawngtute pawisa chhuhsak niin sawi

Mizoram Pradesh Congress Committee (MPCC) chuan SEDP Rs. 25,000/- dawngtute pawisa engemaw zat chu MNF ten an chhuhsak niin an sawi.

Nimin-a thuchhuah an siamah MPCC Media Department chuan MNF-in Mizoram a awm chhungkaw tina SEDP cheng nuai 3 sem an tiam laiin kum 4 an sawrkar chhungin Rs. 25,000/- in chhungkaw tlemte hnenah an sem thei hram nia tarlangin, “Heti chung hian SEDP dawngtu mi rethei zawkte pawisa dawn atangin Hnam Party inti ngat thin MNF Party-in Rs. 500 te, Rs. 1000/- te an lo chhuhsak thung,” an ti a. Tuivawl bial chhunga khaw engemawzatah SEDP tanpuina dawngtute pawisa MNF Party-in an chhuhsak nia tarlangin, “Sakawrdai, Zokhawthiang leh Vaitin-ah te chhungkaw 200 chuangin SEDP Rs. 25,000/- an dawng a, MNF Party-in Rs. 500/- zel an chhuhsak a. N. Khawdungsei-ah SEDP dawng chhungkaw 13-te pawisa Rs. 1000/- theuh MNF-in an chhuhsak bawk. Tinghmun-ah phei chuan chhungkaw 60-in dawngin Rs. 1050/- zel chhuhsak an ni. Hetih lai hian New Vervek-ah chuan an sem leh hunah chhuhsak ve ngei an tum thu MNF hruaituten an sawi bawk. Mauchar-ah hian chhungkaw 70 chuangin an dawng a, MNF-in Rs. 100/- zel an chhuhsak thung,” tiin an thuchhuah ah hian an tarlang a ni.

MPCC thuchhuah chuan SEDP pawisa sem hi MNF Party pawisa ni lo in sawrkar pawisa, kan chhiah pek tlingkhawm, Mizoram Budget chhung a mi ngei a ni tih hi Mizoram mipuiin kan hriat a ngai tih pawh tarlangin, “Kan chhiah pek tlingkhawm atanga MNF Party-in an duh zat zat an tham then ringawt mai hi hriatthiam theih a ni lo. Hei hi Hnam Party inti thin MNF Party-in Mizoram leh a chhunga chengte an hmangaih loh zia tilang chiangtu a ni,” an ti bawk.

Comments

Popular posts from this blog