Leisekawt Mual-ah Pandal sak hna thawk mek

Kumin November 18-20 chhunga Serchhip in Salvation Army thalai khawmpui lian, India Eastern Territory (IET) Salvation Army Youth (SAY) Congress a thlen tur atan Pandal sak hna chu ngawrh taka thawh mek a ni.
Leisekawt Mual-a SAY Congress Pandal sak mekah hian nimin khan a vawi khatna atan mipui nawlpui hnatlang neih niin Serchhip Kawnpui Branch YMA te chu an hnatlang bawk a, he hnatlang ah hian mi 80 vel thawkchhuakin Pandal ruhrel awmsa baka a tihzauhna tur siam hna thawh a ni a, Pandal zauhna hi a sir tuak-ah ft. 12-a zau in siam tura ruahman a ni a, tunah hian Pandal ruhrel chu din fel thawkhat ni tawhin a chung tur Rangva chih mek a ni bawk.

IET SAY Congress neih tura Council hruaitute chuan Pandal sak mekah hnatlang a puitu an awm leh puih tum engemaw zat an awm mek chu lawmawm an tih thu sawiin, nimin khan MNF Adviser J. Malsawmzuala Vanchhawng chuan hnatlang thingpui lumna atan Rs. 5000/- a pek thu an sawi a, hemi hmalam hian bialtu MLA Lalduhoma chuan MLA Fund atangin an khawmpui dawn tur sum tuakna atan inhlawhna a lo siam sak tawh thu an sawi bawk a ni.