Latest News

YMA Rorel Inkhawm vawi 3-na neih niin Eirukna leh hlemhletna a reh theih nana hmalak rel a ni

YMA General Conference neih loh kum-a neih thin YMA Rorel Inkhawm vawi 3-na chu nimin khan Thingsulthliah khelmual-ah neih a ni a, an thurel zingah 'YMA General Conference' tih chu 'YMA Inkhawmpui lian' tia thlak remtih niin Eirukna leh hlemhletna a reh theih nana chak zawka hmalak rel a ni.

Zawlbuk Group YMA in an thlen Central YMA Rorel Inkhawm vawi 3-na ah hian nimin khan Palai ten Central YMA President R. Lalngheta kaihhruaiin Rorelna an nei a, YMA Khawih Agenda 10 leh Sawrkar Khawih Agenda 4 te chu pass vek a ni a. YMA Khawih an pass zingah hian 'YMA General Conference' tih thin chu 'YMA Inkhawmpui Lian’ ti-a hming thlak ni rawh se tih te; Eirukna leh hlemhletna a reh theih nan Central YMA in tun aia chak zawk in hma la rawh se tih te; General Conference/Rorel Inkhawm pualin YMA Member tinah Rs. 5/- khawn ve thin ni tawh rawh se tih te; Hnamdang hnenah inhmun/huan/lo/ram lei leh hralh/hlanchhawn zel a nih loh nan Mizoram chhunga inhmun/huan/lo/ram hralh leh hlanchhawn a nih dawn reng rengin YMA hriatpuina tel zel a nih theih nan Central YMA in chak takin hma la rawh se tih te; YMA chetvelna-a hliampui tuar/nunna chan an awmin Central YMA in tanpuina/ralna pe thin rawh se tih te; Sawrkar atanga lehkha leh Form fill-up tur Mizo tawng a tihchhuah a nih theih nan hmalak ni rawh se tih te; Zonun zemawi uar zawk a inzirtir dan kawng zawn ni rawh se tih te; Thangthar te zingah Mizo tawng hlutna tlahniam zel tihtawp a nih theih nan leh Mizo tawng dik hman a nih theih nan theihtawp a hmalak ni rawh se tih te; Mizoram-ah Land Reform kalpui a nih theih nan Central YMA-in hma la rawh se tih leh Mizo hnuchhamte hnamdangin fa-a an lak loh nan YMA-in hma la rawh se tih te a tel a ni.


Sawrkar Khawih Agenda an pass zingah Mizoram in Market Regulation kan neih theih nan hmalak ni rawh se tih te; Mizoram mipui ten tangkai zawk leh awlsam zawk a kan chhawr theih turin Mizoram hmun hrang hranga Sawrkar Damdawi In te hi hmanraw tha zawk leh thawktu tam zawkin Sawrkarin thuam thain a enkawl kawngah pawh tun aia khauh zawk leh tha zawk a kalpui ni rawh se tih te; Myanmar atanga raltlante hmun hrang hranga awm darh hian harsatna lian zawk min la thlen thei dawna a lan avangin, Sawrkarin Relief Camp changtlung zawk siam tur leh chumi ah chuan dah vek tura hmala turin Sawrkar lamah Central YMA in hma la rawh se tih leh Mizoram-ah Vocational Course zirna hi tun aia uar zawka kalpui ni rawh se tih te a tel bawk a ni.

Nimin-a YMA Rorel Inkhawm ah hian YMA Dan Bu ennawnna chu pharh niin sawiho a nih hnuah pawm a ni a, kum 2022-2023 chhunga Central YMA Budget ruahman Rs. 1,68,80,400/- chu Central YMA Treasurer Fabian Lalfakawma chuan pharhin pawm a ni a, kum hmasa aiin Rs. 55,000/- in a tam zawk a ni.

Report atanga a lan danin YMA-ah hian Branch 819 leh Group 50 awmin Sub-Hqrs. 8 a awm a, member mipa 2,76,689 leh hmeichhia 197,183, an vaiin 4,73,872 an awm mek a, YMA Branch hi Mizoram bakah Assam, Me-ghalaya, Manipur, Tripura leh Nagaland bakah Sajek (Bangladesh)-ah a ding a ni.

YMA Rorel Inkhawm nimin-a neih ah hian kum kalta chhunga YMA Member boral te sunna hun hman a nih bakah YMA in kumtin lawmman a sem thin te semchhuah leh a ni a, nizan khan Pandal-ah Vantlang Inkhawm neih niin Thupui ‘Ram leh Hnam humhalh’ tih hmanga thusawi ngaihthlak a ni bawk.

Comments

Popular News (Last 30 Days)