Latest News

Vawiin ah YMA Football khel tan dawn

Serchhip Sub-Hqrs. YMA buatsaih Inter-Branch YMA Football Tournament chu Vawiin hian Serchhip Sports Complex-ah khelh tan a ni dawn ta.

Serchhip Sub-Hqrs. YMA din a nih hnuah a vawi khatna atana an buatsaih Inter-Branch YMA Football Tournament hi Serchhip Sports Complex-a Football Stadium-ah khelh tur niin Sub-Hqrs. YMA hnuaia Branch 73 awm atangin Branch 32 an tel dawn a, heng zinga 13 te hi Town Branch in Direct-a awp Branch te atangin Branch pahnih an tel bakah Group YMA huamchhuang atangin Branch 17 an tel bawk a. Vawiin chawhnu dar 1:00 hian a hawnna hun hmangin match khelh chhunzawm nghal a ni anga, match hmasa ber chu New Serchhip Venglai Branch leh North Vanlaiphai Damdawi Veng Branch ten an khel dawn a ni.

Tarlan tawh angin tun tuma Tournament hi Knockout System a khelh tur a ni dawn a, a chak lo apiang tlak nghal zel tur a nih dawn avangin match hmasa ber atang hian inkhel hmuhnawm tak tak awm tura beisei a ni a, hun pangngai a inhnehtawk an awm chuan Semi Final hma chuan Penalty Shoot-out hmangin chak zawk zawn nghal zel an ni dawn a, Vawiin atanga thla thar November 1 thleng khian Branch hrang hrang ten an match hmasa ber an khel anga, Nov. 2 atangin Round of 16 hi khelh leh tur a ni dawn a, Nov. 5 atangin Quarter Final khelin Nov. 8-ah Semi Final khelh a ni anga, Nov. 11 khian Final khela zawhfel a ni ang.

He Tournament-a tel zawng zawngte hi Dekchi pek vek an ni dawn a, Champion Team hian Rs. 50,000/- bakah Dekchi leh Certificate dawngin pahnihna in Rs. 25,000/- bakah Dekchi leh Certificate an dawng bawk anga, Semi Final-a chak lo ten Rs. 7000/- ve ve an dawng bawk ang.

Comments

Popular News (Last 30 Days)