Governor leh Health Official ten Health Department hnuaia hmalakna thlirho

Mizoram Governor Hari Babu Kambhampati leh Health Department hotulu te chu nimin khan Raj Bhavan-ah inkawmin Health Department hnuaia Healthcare Service hrang hrangte kalpui mek a nih dan te leh tha zawka kalpui a nih theih dan turte an sawiho.

He inkawmna ah hian Governor chuan Health Department hnuaia hmalaknate chu State mipui tana thil pawimawh ber pakhat a ni tih sawiin, tun dinhmunah thawk tha thawkhat mah se tanlakna tur kawng tam takah a la awm thu a sawi bakah Health Department hotute chu tan la zel turin a fuih a. Healthcare Scheme hnuaia inziaklut an rawn pun chhohna turin theihtawp chhuah a ngai tih sawiin, District Hospital thenkhatah Specialist Doctor dah tur an vang chu pawi a tih thu a sawi a, he harsatna hi a tuartu chu damlo te an nih avangin a rang lama chinfel a ngai a ni a ti.

Governor chuan Mizoram-ah ramhmul damdawi siam turin hmalakna a awm tan chu tha a tih thu pawh he hunah hian sawiin, Health Department pawhin Mizo ramhmul damdawi siamchhuaktute chu Certification an nei theih nan lo tanpui se a tha hle ang tih a sawi a. Hmanlai atang tawhin Mizo pi leh pu ten damlo enkawlna atan ramhmul damdawi an lo hmang thin tih a hriat thu sawiin, heng ramhmul damdawi hriat tlanglawn te hi Health Department ten lo khawnkhawm se, Ministry of Ayush hnenah zirchian tura thehlut turin Health Department hotute chu thurawn a pe bawk a ni.

Governor Hari Babu Kambhampati hova inkawmna ah hian Health & Family Welfare Department hnuaia mipui hriselna tur State leh Central sawrkar hmalakna hlawm lian deuh deuh te Esther Lal Ruatkimi, Principal Secretary chuan PowerPoint hmangin a sawifiah a. Directorate of Health Services, Directorate of Health & Medical Education, Office of Mission Director, NHM, Zoram Medical College(ZMC), MSACS leh Program Cell thenkhat hnuaia hmalakna pawimawh tak tak te chipchiar takin sawiho a ni a. Heng hmalaknaah te hian Central sawrkarah nawr ngai te pawh a awm nia sawi niin, Governor chu Ministry of Health & Family Welfare lam dawrpui tura ngen a ni bawk a. He hunah hian Dr. T.Lalhmangaihi, Principal Director, H&FW, Dr. KK Chhetri, Director, DHME, Dr. John Zohmingthanga, Director, ZMC, Dr. Eric Zomawia, MD, NHM leh Program Cell lian deuh a hotute pawh an tel a ni.