Serchhip-ah PMFME Scheme chungchang leh hamthatna hmuh theih dan zirhona neih a

Commerce & Industries Department, Lead Bank leh Mizoram State Rural Livelihood Mission (MzSRLM), Serchhip tangkawp buatsaihin nimin khan Serchhip-ah Pradhan Mantri Formalization of Micro Food Processing Enterprises (PMFME) Scheme chungchang zirhona neih a ni.

He zirhona Serchhip P&E Veng YMA Hall-a neih hi PMFME-a District Nodal Officer leh District Commerce and Industry Officer F. Lalsawmliana chuan kaihruaiin he hun hmanpuitu Commerce & Industry Department-a Promotion Office HB. Lalremmawia chuan hetiang zirhona hi Mizoram District hrang hrangah kalpui mek a nih thu sawiin, Serchhip District chu ram laili a awm leh kawng hrang hrangah thil ti tak tak thin te awmna a nih avangin he ruahmanna kalpui tur pawh hi a tih hlawhtlin kawngah beiseina sang tak an neih thu a sawi a. He ruahmanna kalpui dan tlangpui tarlangin, eitur sawngbawlna kawnga thawktu ten hlawk zawka hna an thawh theihna tur leh leirem an rah theih chu he hmalakna in a tum ber pakhat a nih thu a sawi a ni.


Pradhan Mantri Formalization of Micro Food Processing Enterprises (PMFME) Scheme hi June ni 29, 2020 khan India ram puma hman turin tlangzarh a ni a, State Level-a PMFME Scheme kalpui turin Commerce & Industries Department chu State Nodal Agency niin State Project Management Unit atan MIFCO dah a ni a. He Scheme hi Individual Entrepreneurs, Farmers Producers Groups, Co-operative Societies leh Self Help Groups ten tangkai taka an hman theih tura duan a ni. Micro Food Processing Enterprises (Food Processing Industries) te hnenah sum leh pai, Technical (khawl) leh sumdawnna atana tanpuina hrang hrang he Scheme kaltlang hian pekchhuah theih a ni a. Food Enterpreneurs, FPOs/SHGs/Cooperative Societies te tan Food Processing industry tenau nuai hnih dinna turin cheng vbc. 10,000 he scheme hnuaiah hian ruahman a ni.

He Scheme hnuaiah hian mimal anga Food Processing lam a hmalatu te'n an Industry tihchangtlunna atan an Project Cost atanga 35%, Credit linked Capital Subsidy an dawng thei ang a, he tanpuina hi cheng nuai 10 thleng pek theih a ni. Chutihrualin, an Project Cost atanga 10% aia hniam lo chu mimal in an tum ve a ngai a, a dang zawng erawh Bank Loan tur a ni.

He Scheme hnuaia tanpuina dil thei te chu mimal/Partnership Intawm firm neitu nihna chanvo neite, Resource Person-in Micro Food Processing Industry nia a chhinchhiah kum 18 aia naupang lo leh pawl 8 (Class VIll) pass chin te niin Chhungkua pakhat atangin mi pakhat chauh in tanpuina hi a dawng thei anga. Chhungkua tih hian a diltu, a kawppui leh an fate a huam ang.

PMFME Scheme in a tum zingah hian Food Processing Industry te tih changtlunna tur Sum Lu (Capital Investment) ruahman sak a, GST leh Udyog Aadhar Registration/Udyam Registration felfai taka nei tur leh FSSAI pawmpui tlaka 'Eitur Thianghlim' nei tur a tanpuina leh zirtirna pek telin District Resource Person Henry Saingura (Serchhip) chuan hemi chung-changah hian zirtirna a pe bawk a, ani bakah hian UD&PA Department Serchhip District atangin Social Development Coordinator Ram-pansangi chuan Home Compositing chungchang ah zirtirna pein Inchhungkhur-a kan bawlhhlawh neih tawih mai thei atanga leitha siam dan leh heng leitha te hi thlai chawmna atana a that bikna te kalkhawmte a zirtir a ni.

Comments

Popular posts from this blog