MZP Assembly vawi 66-na Minister in hmanpui

Mizo Zirlai Pawl (MZP) Assembly vawi 66-na Darzo khuaa neih mek chu nimin khan bialtu MLA leh Higher & Technical Education Minister Dr. R. Lalthangliana chuan khuallian niin a hmanpui.

'Zirlaite - Zofate leh Zoram tan' thupui hmanga MZP Assembly-ah hian Minister Dr. R. Lalthangliana chuan Zirlai pawlte hi ram leh hnam hmasawn zelna tura pawl pawimawh berte zing ami a ni tih sawiin, MZP chu chak taka a kal zelna turin hruaitute leh zirlaite duhsakna a hlan a. MZP thil tumte zinga pahnih - ‘Kuthnathawh uar leh chawisan’ leh ‘Mizoram leh Hnam tana mi tangkai ni tura zirlaite buatsaih’ tih te chu a ngaih pawimawh zual thu sawiin, zirlai kalkhawmte chu thawh hreh neilo tur leh hnam dang thalaite tih theih te an ti ve thei a ni tih hriaa rilru huaisen taka hmalam pan turin a chah a. Khawvel changkang chho zelah kan ram economy te a changkangin a thang chho ve zel a, hei hian hna thar (job opportunity) tam tak a keng tel a, amaherawhchu thiamna tak tak neilo chuan heng hna te hi a hmuh theih loh a ni, tiin zirlaite chu thiam tak tak tumna rilru nen tumruh taka inzir turin a chah bawk.

MZP Assembly vawi 66-na hi nizan hmasa khan neih tan niin Palai lawmna inkhawm neih a ni a, nimin-a Vantlang Inkhawm neih ah MZP General Hqrs. President Lalnunmawia Pautu chuan zirlai kalkhawmte chu ram leh hnam vei tur leh an thiamna leh an theihna te ram hmasawnna tura hmang tangkai turin a fuih a. Mizoram sawrkar scheme leh hmalakna pawimawhte leh kan State Budget te pawh lo zirchiang ve a, ram hruaitu tha tak la ni thei tura inchher hriam turin a fuih a ni.

Nimin chawhnu lama Vantlang Inkhawm neih chu Sports & Youth Services Minister Robert Romawia Royte chuan hmanpui bawkin MZP Assembly chu kawng hrang hranga zirlaite ti phur thartu leh chona thar siam saktu anih ngei a beisei thu a sawi a. “Ruihhlo in kan ram nasa takin min tibuai a, a bik takin mipa in nunna an chan phah nasa hle a. Tun dinhmunah Mizo mipa kan tlem tial tial a, Electoral Roll-ah pawh kan tlem zel hi a veiawm takzet a ni,” tiin thalai rual kalkhawmte chu ruihhlo laka fihlim tur leh a do kawnga mahni zawn theuha ke pen turin a chah bawk.

Mizo Zirlai Pawl (MZP) hi October ni 27,1935-ah din niin pawl thupui chu ‘Tanrual hi chakna’ tih a ni a. Tun dinhmunah MZP hnuaiah Headquarters 13, Sub-Headquarters 47 leh Branch 102 a awm mek a. Tun tum Assembly-ah hian hmun hrang hrang atangin Palai mi 800 vel an kalkhawm a ni.