Naktuk atangin Lehkhabu pho runpui nei dawn

Mizo Writers Association (MWA) leh Art & Culture Department tangkawp chuan naktuk, October ni 25 atanga Oct. 28 chhung hian Aizawl-a Vanapa Hall-ah lehkhabu pho runpui an buatsaih dawn.

Lehkhabu pho runpui neih tur chungchangah hian Inrinni khan MWA hruaitute chuan Aizawl Press Club-ah thuthar thehdarhtute kawmin MWA President R. Lallianzuala chuan, “Lehkhabu thenkhat hi a man pangngaia hralh tur anih laiin lehkhabu tam zawkah chuan a man tlawmin hralh a ni dawn a. A hawn ni hian kum engemaw zat lehkhabu lei tur awm tawh lo, tunhnaia chhut thar leh te bu 30 vel tlangzarh a ni dawn a. Mizo zinga Padma Shri hmu hrang hrang te lehkhabu pawh phochhuah a ni dawn a ni,” a ti a. Bookfest-ah hian Mizo Academy of Letters in lehkhabu tha 'Book of the year' an puan tawh lehkhabu te bakah Mizo Writers Association in lehkhabu lehlin tha an thlan te pawh phochhuah a ni dawn tih a sawi bawk.

MWA hruaitute chuan tun tum Bookfest-ah hian Mizo lehkhabu tha te chu an kim hle dawn niin an sawi a. Zawhna chhangin Covid len hnu hian Mizoten lehkha an chhiar nasa in lehkhabu chhuak pawh a pung sawt niin an sawi. MWA hian August ni 12-16,2019 khan hetiang bookfest hi an lo buatsaih tawh a, khami tum khan lehkhabu hralhna atang nuai 35 vel an hmu a ni.