Shalom Special School ten PTS Thenzawl an tlawh

Serchhip-a Shalom Special School-a zirlaite chuan Inrinni khan Thenzawl leh a chhehvel te tlawhin Police Training School (PTS) Thenzawl a awm ten an thiamthil chi hrang te an lo entir bawk.

Pianphung-a rualbanlo te zirna, Shalom Special School-a zirlaite hian Thenzawl-a Dilpui leh Golf Course & Resort te tlawhin hemi hnu hian PTS hi an tlawh leh a, PTS hian ropui taka lo dawngsawngin PTS thawktu leh training lai te chuan Parade hmuhnawm tak an entir a, Company Drill te, Physical Training dan leh ralthuam lek dan an entir bakah ralthuam hrang hrang te en theih turin an chhawpchhuah sak a, Shalom Special School tan chhun chaw buatsaih bawkin Shalom School-a naupang te pawhin an thiamthil chi hrang hrang an entir bawk a ni.

He hunah hian PTS Principal HL. Thang-zuala chuan mi pawimawh tak tak vawi engemaw zat an lo mikhual tawh thu sawiin, tun tuma an mikhual te chu mikhual tha ber an nih thu a sawi a, anmahni lam pawh an phur thu leh nasa taka an lo inbuatsaih thu te pawh a sawi a. He huna tel Police chhungkua te chu midangte tana thil tha ti tura fuihin, “Kan damchhung reilote ah hian mi te bera kan ngaihte chungah pawh thil tha tih theuh tum ila, chu chuan keimahni ah hlimna min pe thin a ni,” a ti bawk.

PTS Thenzawl-ah training lai te hian kumtawp-a mi harsate tanpuina turin an remchan ang pawisa an thawhkhawm thin a, heta an sum thawh tlingkhawm atang hian Shalom Special School Serchhip hi Rs. 25,000 an hlan bawk. He hunah hian School enkawltu Spastic Society Chairman Upa Vanlalchhunga chuan an School chanchin leh an kalpui dan te sawiin, PTS-a awm ten nasa taka an lo dawngsawng chu lawmthu a sawi bawk a ni.