Serchhip-ah Ruihhlo dona atana buatsaih 'Inter-Branch YMA Football Tournament' khelh tan a ni

Serchhip Sub-Hqrs. YMA in ruihhlo dona atana buatsaih 'Inter-Branch YMA Football Tournament' chu nimin khan Serchhip Sports Complex-ah khelh tan a ni.
YMA Branch 32 te inelna tur he Tournament hi Main Sponsor R. Vanlaltluanga (Carmel Pharmacy, Aizawl) chuan hawngin Serchhip District chu infiamna kawng hrang hranga hmingtha tak a lo nih tawh thin thu sawiin, infiamna bakah kawng hrang hrangah mi hmingtha tak tak an lo awm tawh thin thu a sawi a. Hei mai bakah hian ziak leh chhiar thiam tam lamah pawh rampum huapa a sang pawl a nih thu sawiin, Kuthnathawktu tamna leh mi taima tak tak tamna, Covid hri len lai pawha Aizawl khawpui chawmtu langsar a nih thu a sawi a. Chutihrual chuan ruihhlo avangin Mizoram-ah thalaite kan chau mek tih sawiin, thalaite kan chauh chuan nu leh pa pawh chauin Kohhran leh pawl te pawh chak taka kal theih a nih bik loh thu a sawi a, hetiang zela kan awm kan ram awm zel dan tur kan ngaihtuah a tul thu a sawi bawk.

Khuallian chuan kan ram leh hnam hmasawnna turin thalai ten ruihhlo kalsana hma kan sawn a tul thu pawh he hunah hian sawiin, mahni chhungkua ah theuh enge kan dinhmun tih kan chhut a ngai tih a sawi a, thalai ten thawhchhuah kan nei lo zel a nih chuan hma kan sawn dawn lova, a bikin mipa zingah hmeichhia ten neih tur an hriat loh avanga pasal nei lo tam tak an awm ta nia a lan thu sawiin, Mizo hmeichhia ten fa an hrih loh chuan Mizote kan tlem zel dawn thu leh kan tlem zel chuan kan ral mai a hlauhawm avangin Mizo ten inthlahpun kan mamawh thu a sawi a, chumi atan chuan Mizo mipa ten hmeichhia te neih tlak ni tura tan kan laka ruihtheih thil laka kan fihlim a tul thu a sawi bawk a ni.

Nimin-a he Tournament hawnna hun hi Serchhip Sub-Hqrs. YMA-a Fin. Secretary Zolianmawia chuan kaihruaiin Serchhip Sub-Hqrs. YMA Secretary PC. Vanlalluna pawhin thu a sawi bakah Sports & Recreation Committee Secretary C. Laldinpuia chuan Tournament khelh dan tur chungchang a sawi a, he Tournament-a tel Branch hrang hrang aiawh ten ruihhlo dona atana Tournament hi thianghlim taka khel tura intiamna thu sawi rualin hemi hnu hian Match khelh chhunzawm nghal a ni a, November 11, 2022 khian Final khela zawhfel hman tura ruahman a ni.