Nakum inthlan ah Pathian leh mipui zarah MNF a sawrkar leh ngei dawn - Dr. R. Lalthangliana

MNF Adviser leh Health Minister Dr. R. Lalthangliana chuan nakum inthlan ah Pathian leh mipui zarah Zoramthanga kaihhruai MNFchu a sawrkar leh ngei ngei dawn niin a sawi.

Nimin-a MNWF Aizawl South-I Political Training Liando Resort-a neih a hmanpuina ah he thu hi sawiin Dr. R. Lalthangliana chuan MNF danglamna chu Mizo zawng zawng kan lenna pawl a ni tih sawiin, “He pawl lo irhchhuahna chu Mizoram-ah Tampui mitthi a thlen lai khan, eng pawl mahin hma an la lo a, Assam sawrkarin min enkawl lai kha a ni a, ngaihthah kan nih atanga min chhanchhuak tura he pawl hi lo ding a ni,” a ti a. “Hun a lokal zel a, October ni, 22, 1961-ah Pu Denga In Tuikhuahtlang-ah mi fing ber ni bik lo, mi 8 lekte kalkhawmin an din a ni a. An innghahna pawh Sam 20 : 7 kha a ni. He pawl hi Mizo nihna dik tak, Mizo Nationalism  phochhuak tura Pathian ring chunga kal a ni. He pawl-a awm kan nih chuan 'Pathian leh kan ram tan' tih hi a pawimawh em em a. Pathian kan dah hmasa ber a, a dawtah ram kan dah pawimawh leh a ni. A chang chuan hunkhirh takah kan ding thin a, mahse, a hunah Pathian in min hruaichhuak leh zel a ni,” a ti.

Dr. R. Lalthangliana chuan, “Pu Denga'n min awm loh san hnuin kum 1990 atang khan Pathian tih mi leh hruaitu fel tak, Leadership nei tha Pu Zoramthanga kan nei a, a kaihhruaina hnuaiah lungrual takin kan kal zel a, Pathian in sawrkarna min pe leh ta a ni,” a ti a. Tun term-ah hian an sawrkar tantirh kum khat hnu chauhah Covid-in min nuai tih sawiin, “Kum hnih leh a chanve dawn hripuiin min nuai a, engmah ti theiloin kan awm a, Sawrkar hna kan la thei lo a, Contract/Supply hna a inpek theih loh a, hun pangngaiah kan dinglo a ni tih hi mipui hian min hriatpui ka duh a, engemaw chen chu Covid khan min la nghawng dawn a ni,” a ti a. Tunah hian dan pangngaiin an kal tan ve dawn chauh tih sawiin, “Theihtawp chhuah kan tum zel a ni. Nakum inthlanah hian Pathianin hun tha min pe ang a, kan sawrkar leh ngei dawn a ni,” a ti a. Pathian lawm tlak leh pawm tlaka an kal chu an sawrkar lehna tur atan a pawimawh takzet tih a sawi bawk.

Comments

Popular posts from this blog