Kumin-a hunpui lo thleng turah halpuah leh halmawi hrang hrang khapna kalpui leh dawn

Home Minister hova sawrkar mi pawimawh te nimin-a thukhawm chuan Krismas, Kumthar leh Puja (Diwali leh a dangte) lo thleng turah Halpuah, Halmawi, Silailem mu nei chi leh Sky Lantern khap tlat nise an ti.

Nimin khan Home Minister Lalchamliana hovin Aizawl-a SAD Conference Hall-ah Sawrkar mi pawimawhte leh tlawmngai pawl hruaitute thukhawmin kumin Krismas, Kumthar leh Puja (Diwali leh a dangte) lo thleng tura Halpuah, Halmawi, Silailem mu nei chi leh Sky Lantern khap chungchang hi an sawiho a, heng hal theih hrang hrangte hi mihring hriselna atana thil pawi thei a nih avangin khap tlat nise an ti a. Khapna thupek hi a rang thei ang bera tihchhuah tura relin, Dan anga khapna thupek tihchhuah a nih veleh Sawrkar-a dan leh thupek kengkawhtu ten hma an la tan nghal dawn a. Chutiang bawkin, Veng hrang hrangah tlawmngai pawl te leh Local Council te pawhin anmahni zawn theuhah hma lak tan nghal ni se an ti bawk.

Halpuah, halmawi leh a dangte mihring hriselna atana a pawizia inzirtirna leh hal lo tura mipui thinlung hneh tura Campaign uar leh zuala kalpui ni se tiin he thutkhawm ah hian rel a ni bawk a, Veng tina Information mike te, Print leh Electronic Media te leh Social Media kaltlangin Awareness Campaign kalpui tum a ni a. I&PR bultumin halpuah leh halmawi hal that lohzia lantir thei tur Skit/Drama tawi insiamsiak buatsaih nise tiin Video Clip siama thehluh tur a ni ang.

Sumdawng te mai bakah mimal leh chhungkaw tin te chu heng Halpuah, Halmawi, Sky Lantern leh silailem mu kapchhuak theite hi chah lo turin ngen an ni a; lo chah ru emaw, zuar an awm a nih chuan dan angin hrem an ni dawn a. Assam Rifles, BRTF, BSF leh sipai hmunah halpuah an hal lohna turin khapna Order pek ni se tiin an rel bawk a. Mizoram ramri-a Check Gate awm zawng zawngah uluk lehzuala lirthei lo lut endik tur te, sumdawnna hmun leh Kudam te a tul dan a zira endik/check te leh Police te bakah tlawmngai pawl ten hunpui laiin duty tur insiam leh nise tiin an rel a. Sumdawng bungraw phur lirthei te mai bakah a tul dan angin mimal lirthei te pawh endik ni se an ti a. Khapna thupek bawhchhia te chu Police te mai bakah mipui mimir pawhin thuneitute hnenah an report thei a ni tih sawi lan niin, Whatsapp kaltlanga thlalak emaw, Video emaw hmanga thehlut duh te tan pawhin awlsam zawka an thehluh theihna tur phone number siam ni se an ti bawk.

He thutkhawm a tarlan a nih danin kum kalta Krismas leh Kumthar bawr ah dan bawhchhia mi 26 man niin thubuai 23 ziahluh a ni a, Court chuan an zinga mi 18 a hrem (convict) tawh a, Court case kal lai mek 5 a la awm bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man