Midang rinchhan lova kan dinchhuah a ngai - HM

Home Minister Lalchamliana chuan ram leh hnam humhalh turin mahni intodelh a, midang rinchhan lova kan dinchhuah a ngai tih a sawi.

‘Vai Len leh Mizote : Hman pasalthate Hnuhma’ tih thupui hmanga PUC Seminar Hall-a Seminar neih a hmanpuina ah Home Minister Lal-chamliana chuan tunlai khawvel thlirin ram leh hnam humhalh tura tharum thawh a rem lohna tam tak a awm tawh avangin kawng dang kan dap a ngai tih a sawi a, “A pawimawh ber zinga pakhat chu mahni intodelh a, midang rinchhan lova kan dinchhuah hi a ni,” a ti a. Kawng hrang hrang – zirna leh thiamna lamah te, ei leh bara intodelh kawngahte, infiamna kawngah te theihtawp kan chhuah a, mi thawhchhuah sa vek ringa khawsa lova, keimahni kutchhuak ngei ringa kan intunnun theihnan theihtawp kan chhuah vek a tul a ni,” a ti bawk.

Home Minister chuan zalenna sual hian a man kan pe tam em em tih pawh sawiin, “Vai len hre pha lo mah ila rambuai (Mizoram) kan hre pha ve a, nunna hlu tak tak kan chan bakah In leh lo kan chan a, mihring zahawmna nasa taka tihbawrhban a ni a, a tuartute thinlungah ser nung lian tak tak hnutchhiah a ni thin a, zalenna suala kan mihuaisente inpekna hi thangthar lo awm zel turte pawhin kan hriat reng mai bakah kan inhrilh thar fo a pawimawh a ni,” a ti bawk.