Hripui avanga vaibelchhe sang thum chuang kan hmuh tak loh awm - Chief Minister

Chief Minister Zoramthanga chuan Sawrkar laipui atanga sum kan hmuh thin, Budget-ah pawh telh vek tawh hripui avanga vaibelchhe sang thum chuang kan hmuh tak loh thu a sawi.

Mizoram Civil Service Association (MCSA) General Conference vawi 46-na nimin-a Aijal Club-a neih a hmanpuina ah Chief Minister Zoramthanga chuan Hripui leng leh thil dang dang avanga State in sum harsatna a tawh dan tarlangin, sawrkar laipui atanga sum kan hmuh thin, Budget-ah pawh telh vek tawh hripui avanga vaibelchhe sang thum chuang kan hmuh tak loh thu hi sawiin, chung zawng zawng kara tun dinhmun kan thleng chu thil vanneihthlak tak a nih thu a sawi a, chumi atanga kan kal leh zelna tur chu kan resource neih hrang hrangte tangkai thei bera hman a intundin a nih thu a sawi a ni.

Chief Minister chuan ram chhunga kan neih sa mipui chawm zo hman tangkai theih ram zau tak, sik leh sa, ruahtui duhthusam te, heng resource hrang hrangte hi enliam mai lova, economy hmasawnna atana hman tangkai theih vek a ni tih rilru pu a, a nachang hre tura ngaihtuahna thlak a tul a ni, tiin Resource Mobilization mamawhna a sawi a, chung atan chuan MCS Officer te chu thurawn petu pawimawh dinhmun an luah thu sawiin, ram hmasawnna atan sawrkar inrelbawlna kawngah kalphung felfai tak neih a, thawktu te pawhin tih takzeta hmasawn duhna thinlung pu chunga an thawh a tul thu a sawi bawk.

Mizoram Civil Service Association (MCSA) General Conference hian chawhnu lamah rorelna neiin District thar pathum Saitual, Khawzawl leh Hnahthial-ah te District Administration tih changtlun an duh thu te; Arunachal-Goa-Mizoram-Union Territories (AGMUT) Cadre atang hian Mizoram tan All India Service Cadre hran neih an duh thu te; Chak zawka Mizoram economy a than zelna tura State sawrkar hmalakna te MCSA in thlawp tlat nise tih te leh Nasa zawka e-Governance kalpui tura State sawrkar hmalakna te thlawp tlat nise tih te an rel a, MCS Officer-te chu Sawrkar neitu an nih angin, midangte aia hawihhawm, zaidam, thinnel leh thawk tam tur a beisei tlat an nih thu pawh sawiin, he dinhmun pawimawh tak hi ram leh mipuite tana theihtawp chhuah chunga vawng nung tlat zel turin tun aia nasa lehzuala mahni awmna theuhah tan la turin an in chah bawk a ni.

Nimin-a he hun hmanna ah hian Chief Minister chuan MCSA Official Magazine ‘RAHBI’ tih chu tlangzarhin Report hrang hrang te ngaihthlak a nih bakah MCS atanga IAS-a kaisang Sangchhin Chinzah leh Zodingpuii te hnenah lawmpui an hlan a, an Member boral mi 3 te sunna hun an hmang bawk a ni.