Serchhip-ah Police an Duty laia hmelma kut-a thi te zahna leh chawimawina hun hman a ni
Serchhip Police Station Complex-a Police Commemoration Day puala hun hman ah hian Serchhip Addl. SP chuan ram leh hnam tana Police Martar te hriatrengna Ni chuan Police (Uniform ha te) tan inpumkhatna leh in unauna thuk zawk siam se a duh sawiin, ramchhung State hrang hrangah Duty laia Police thi ta tam tak an awm laiin, Serchhip Police te zingah nunna chan an awm lo chu lawmawm a tih thu a sawi a ni. Hei bakah hian Adsl. SP Saidingliana chuan Police hna chu mipuite rawngbawlna hna zahawm tak anih thu te, Duty-na ah nunna hial chan theihna anih thu te sawiin, rinawmna leh dikna nen inpe lehzuala ram tana theihtawp chhuah thar leh theuh turin Police te chu a chah a, Police te chu mipui rawngbawl hna aia thil dang ngaih pawimawh zawk nei lo turin a fuih bawk a ni.
Serchhip-a Police Commemoration Day hmanna ah hian kum kalta chhunga an Duty laia Police thi mi 250 an awm thu tarlangin, an zingah hian Serchhip District mi an tel lova, State hrang hrang dinhmun chhiarchhuah a ni a, heng mite zahna leh sunna hun hman chhunzawm a ni.
British hunlai atang tawhin India Police te hian Tibet leh India inrinna lai bawr mel 2500 zet an veng thin a, October ni 21, 1959 khan mahni ram venghim tura hnathawk (duty) mek India Police, Karam Singh, DCIO leh a hote Police mi 20 rual chu Aksai Chin pela ralthuam famkim nena rawn lut ru China sipai rualte chuan Hot Springs (Ladakh)-ah lambun in Automatic Rifle leh Grenade hmangin an lo bei a. A hmunah mi 10 thiin mi 7 chu hliam na tak tuarin China sipaite chuan an man a. Heng ram tana nunna chan te ruang hi China sipai chuan 13th Nov. 1959-ah India kutah hlanin Ladakh-a Hot Springs-ah chawimawina famkim nen halral an ni ta a ni. Hemi hnu kum 1960 atang chuan 21st October chu 'Police Commemoration Day' atana ruat niin kumtin Police ram tana nunna hlante hriatrengna, sunna leh chawimawina hun atan an hmang ta thin a ni.
Comments
Post a Comment