Serchhip District atanga SEDP dawng turte Bank Account-ah sum thun fel a ni tawh

Serchhip District-a SEDP kalpuitu Department hrang hrangte chuan ruahman angin an Department hnuaia beneficiary te hnenah tanpuina an sem zo nia an hriat thu sawiin, Department thenkhat chuan beneficiary te hmalakna enfiah turin ruahmanna an siam mek.
Mizoram sawrkar in Family Oriented SEDP a kalpui mekah a hmasa bera tanpuina dawng tura thlan te chu September leh October, 2022 chhungin 1st Instalment Rs. 25,000/- theuh sem turin ruahmanna siam a ni a. Hemi ang hian Serchhip-a Department hrang hrangte chuan tanpuina sum hi an semchhuak zo tawh tih sawiin, Department hotu inthlak avanga tanpuina semchhuak tlai ber UD&PA Department chuan October 20, 2022 khan tanpuina sum an pechhuak zo tih an sawi a, hemi hmalam hian Department dangte chuan an lo semchhuak fel tawh a, tanpuina dawngtu tur zingah Bank Account felloh avanga an Account-a sum lut mai lo te pawh an chingfel tawh hlawm nia an hriat thu Department hotute chuan sawiin, tanpuina dawng tura thlanchhuah te atangin engmah sawiselna dawn an neih tawh loh thu an sawi a ni.

SEDP Line Department-a thawk te chuan 2nd Instalment chungchangah hmalakna an la neih loh thu sawi hlawmin, Department thenkhat chuan tanpuina dawngtute hmalak dan enfiah turin ruahmanna an siam mek thu an sawi bawk a ni.

Tarlan tawh angin Serchhip District-ah hian Assembly bial pathum awmin heng bial tinah hian beneficiary 1500 zel, a vaiin Serchhip District atangin mi 4500 thlanchhuah tur ni mah se Hrangturzo Bial-a Chekawn khua ah mi pakhat thlan kim loh a ni a, hei pawh hi hnawhkhah leh tura ruahman niin a hnawh-khahna tur hi thlan fel ni tawhin Planning and Programme Implementation Department-ah thehluh a ni tawh a, tunah hian pawmpuina nghah mek a ni tih DC Office atanga kan thudawnna chuan a sawi bawk.