Aizawl-a Customs Division hotute ten Governor kawm

Customs Division, Aizawl hotute chuan nimin khan Governor Hari Babu Kambhampati kawmin Customs Division hnathawh dan te, an hmalakna leh harsatna hrang hrangte an hrilh.

Customs Division, Aizawl-a Customs Asst. Commissioner H.L. Songate leh Customs Inspector pahnih -T. Paukhochin leh Vipul Rathore te hian Raj Bhavan-ah Governor hi kawmin Asst Commissioner, Customs Division H.L. Songate chuan an hnathawh pawimawh ber chu India ramri-ah him taka insumdawn tawnna vil leh dan phalloh thilte luh loh nan venhimna hna thawh a ni tih sawiin, Officer leh Staff an indaih loh vang erawh chuan duh angin hma an lak chak theih lo thu Governor a hrilh a. Ramri-ah dan phalloh thil tawlhruk (smuggling) bungrua an mankhawm chi hrang hrang dahthatna tur hmun (warehouse) an neih that loh avangin harsatna an tawk nasa thin tih a sawi.

Hei bakah hian Foreign Post Office dinna turin Postal Office, Aizawl hotute nen indawr mek thu te, Lawngtlai District-a Silsury-ah Customs Office hawn a tul thu te, Zokhawthar Land Customs Station-ah Wifi Connection, ICES Mapping, Bank Authorisation te tihfel a nih tawh thu a tarlang a. Dan lova bungrua tawlhrukte hrek thei tur chuan heng hmun - Zokhawthar, Hnahlan, Vapar, Ngur, Zote, Tlangsam, Farkawn, Sesih, Vangchhia leh Vaphai-ah tun aia khauh zawka vil a tul thu a sawi bawk.

Governor Hari Babu Kambhampati chuan Mizoram-a Customs Division ten harsatna tam tak karah theihtawp an chhuah thin avangin lawmthu a hrilh a. An hmalak zelna turah theihtawp chhuahpui zel a inhuam thu leh harsatna an neite chu a hnenah lehkha ziakin thehlut a, chu chu a theih ang anga bawhzui sak tur thu a hrilh a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar