Govt. Lungpho H/S kum 50 tlin lawmna leh Exam Centre lawmna bialtu MLA hovin neih a ni

Govt. Lungpho H/S in kum 50 an tlin lawmna leh High School Leaving Certificate (HSLC) Exam Centre thar an nih lawmna chu nimin khan neih niin bialtu MLA leh Assembly Deputy Speaker Er. Lalrinawma chuan a hmanpui a ni.
Govt. Lungpho H/S Building bula Jubilee hriatrengna lungphun a hawn hnua Lungpho Mual zawl-a a lawmna inkhawm neih ah bialtu MLA Er. Lalrinawma chuan Govt. Lungpho H/S in kum 50 a tling chu ropui a tih thu leh tun dinhmun a thlen theihna tura bul lo tantute leh a thawk tawh leh thawk mek te inpekna chu fakawm a tih thu leh chawimawi an phu a tih thu a sawi a. Mihring te chu kan pian tirh atanga zirtir ngai kan nih thu sawiin, “Zirna leh hriatna in mihring nun a ti nuamin a ti famkim a, mitinin kan mamawh, kan hringnun bulthut chu zirna hi a ni. School chu thil kan zirna hmunpui ber leh pawimawh berte zing ami anih avangin kan tan a hlu em em a, zirna In te kan neih ang ang te hi kan hluta, kan duat pawh a tul hle a ni,” a ti.

Assembly Deputy Speaker Er. Lalrinawma chuan Lungpho High School sawrkarin HSLC Exam Centre thar atan a ruahman sak lehzel chu lawmawm a tih thu pawh sawiin, School Education Department chungah Tuikum bial mipui aiawh in lawmthu a sawi a, Exam Centre hmingtha tak a nih ngei theih nana tan la sauh sauh turin a bial mipuite a chah bawk.

He hun hi School Education Department Director Dr. H. Lalthlangliana pawhin hmanpuiin Golden Jubilee Souvenir a tlangzarh a, Govt. Lungpho High School in Golden Jubilee an lawm kumah HSLC Exam Centre thar atan sawrkarin a puan sak chu a lawmpui thu sawiin, mipuiten mahni ta anga enkawl chhunzawm tlat tura a beisei thu leh Centre hmingtha tak nih tir tum tlat turin a chah a. School upa an nihnaah lungawia inchhuang mai lovin School tha leh rintlak zawk nih chhoh zel tuma bei tauh tauh turin thawktute, zirlai naupangte leh khawtlang nu leh pate a chah a ni. 

School Golden Jubilee leh Exam Centre thar lawmna inkhawm hi Lungpho VCP Lalzarmawia Khiangte chuan kaihruaiin Mizoram Board of School Education (MBSE) Chairman JH. Zoremthanga leh Serchhip District Education Officer (DEO) Lawmawma bakah H. Zonunsanga, Executive Councillor AMC te pawhin thu an sawi bawk a ni.