Latest News

Tualte khua ah Tomato Festival hman a ni

Khawzawl District-a Tualte khua chuan nimin khan ‘Tomato Festival’ an hmang a, he hun hi Deputy Chief Minister Tawnluia chuan khuallian nia hmanpuiin Tomato sawrna khawl bun chu a hawng bawk.

Tualte YMA Hall-a Tomato Festival-ah hian Deputy Chief Minister chuan Tualte khua tan Tomato chin uar zel tha a tih thu leh Mizoram pum huapin Tomato neitu nihna hauh tlat a tul tih a sawi a, Tualte khua in kuminah Tomato hralhna atangin cheng vbc. 2 chuang an lei tawh thu leh Sialhawk pawhin Lakhuihthei hralhna atangin cheng vbc. 1 dawn an lei tawh bawk thu a tarlang bawk. He hunah hian Deputy Chief Minister hian Tualte Tomato Growers' Co-operative Society Ltd. (TTGCS) siam Tomato Ketchup, Rs. 40/- man chu mipuite lei theih turin a tlangzarh nghal bawk.

Tualte khuaah hian kum 2018 khan KVK hmalakna in Tomato chin chhin a nih hnuah kum 2019 khan Tualte Tomato Growers Association dinin, Horticulture Department leh KVK hmalakna in chhungkaw 24 in Tomato hi eizawnnan an ching tan a, tunah hian Tomato chingtu chhungkaw 223 chu Society-ah chanpual neiin an awm mek a, kuminah hian chhungkaw 223 Grade A atangin Rs. 2,74,33,602 leh Grade B atangin Rs.3,02,740 an lei tawh a ni. Nimin-a hawn tak Tomato sawrna hmunah hian Tomato herna khawl, Tomato hersa thlit fimna leh thlit fim sa pack-na khawlte awmin MLA Fund atanga lei a ni.

Comments

Popular News (Last 30 Days)