Kum 2023 MLA thlanah ZPM-in a hlangin Kalphung thar sawrkar siam kan tum - K. Sapdanga

ZPM Working President K. Sapdanga chuan kum 2023 MLA thlanah ZPM-in a hlangin ‘Kalphung thar sawrkar’ siam an tum thu a sawi.

ZPM Lai District Hqrs. in nimin zing-a Lawngtlai Areopagi-a mi thar lawmluh leh Vantlang Inkhawm an neih ah ZPM Working President chuan ZPM chu kum 2023 inthlanpui atan mipui ten an buatsaih hle nia a hriat thu a sawi a, “ZPM sawrkar hi mipui ten an nghakhlel a, a nghakhlel ber tur pawh Lai District mipuite kan niin kan hria a, chutianga hmasawnna hna thawk tur chuan MLA pahnih kan thawh dawn ni pawhin kan hria. He ram hi kan hmangaih a nih chuan a siamtu tur kan thawh dawn a ni mai a, thil mak a ni lo,” a ti a. “Kan kalna apiangah mipuiten 'ZPM an sawrkar dawn' an ti a; nakum inthlan lo awm tur hi hun dang ang lo takin neutral leh sawrkar hnathawk ten an nghakhlel hle; party-ah an tui thar thut tihna a ni lo, sawrkar kalphung an han en a, an tan hei aia mangan ngaihna a awm tawh lo,” a ti.

ZPM Working President chuan, “CM candidate atan VUC chuan Pu Duha min pe a, chu chu ZPM hian zaa zain kan pawm a ni. ZPM hian kum 2023 inthlan lo awm turah hian eng party nen mah thawhho a la rel lo, absolute majority sawrkar nei turin a inbuatsaih mek zawk a ni. Chumi atan chuan Undivided Chhimtuipui District atangin MLA pali chu kan thawh thei turah kan ngai. Thahnemngai taka thawk chungin, thlamuang takin lo awm rawh u,” a ti bawk.

Nimin-a ZPM-a an lawmluh zingah hian H. Thangchemsanga (Ex-MDC), PT. Lalchuanglura (Ex-MDC) leh Keihranga (MDC Independent Candidate) te telin ZPM Working President chuan, “Chhim tawp atanga ZPM meichher chhem alh tak tak turin kan ring tawk che u a, in zarah rampum a kang duai duai ang tih kan ring. Kum 2023 MLA thlanah ZPM-in a hlangin Kalphung thar sawrkar siam kan tum a, Laifa an tel ngei tur a ni. MLA pangngai lo deuh turte pawh kan lo beisei dawn a ni,” a ti bawk.

He hunah hian H. Thangchemsanga (Ex-MDC) chuan ZPM a zawm chhan sawiin, “Hun rei tak ka lo awm tawhna ah hian Lai fate hi kan him tawh lo a ni tih chiang takin ka hmu a, kan hmasawnna tur pawh hi an ngaihtuah tak tak lo,” tiin “Hmasawnna hnathawh te hi central pawisa a ni; kan ADC budget atang chuan tihngaihna a awm lo, hlawh leh pension-ah a kal zo vek a ni,” a ti bawk.