Hri leng-a ZMC-a thawktute inpekna fakawm ti

Health Minister Dr. R. Lalthangliana chuan Covid hri len laia ZMC-a thawktute inpekna leh thawhrimna chu fakawm a tih thu sawiin, “An entawn tlak takzet a ni,” a ti.

ZMC College Week kharna leh Cultural Day ‘ELIXIR 2022’ nimin-a Vaivakawn Cultural Centre-cum-Auditorium-a neih a hmanpuina ah he thu hi sawiin Health Minister chuan Sawrkar chuan Zoram Medical College thuamthat leh tihchangtlun hna a thawk zel tih sawiin, hmalakna hrang hrang a tarlang a. Nakum-ah ZMC atanga MBBS First Batch (2018) te chu an pass chhuak tawh dawn tih sawiin, anni Batch hian National Medical Inspection tha taka an paltlang chuan ZMC hmingthatna leh zahawmna thui takin a keng tel dawn tih a sawi. Mizo Doctor-te zingah MBBS chu an tam tawh naa mithiam bik, Super Specialist an la tlem thu pawh Minister chuan sawiin, tuna ZMC-a MBBS zirlaite pawh thiamna sang lehzual um turin a fuih a. Mizo zingah Cancer Super Specialist pakhat chauh an la awm thu leh tunhnaiah Super Specialist 2 - Cardiology (Lung) leh Nephrology (Kal) ah an awm leh ta chu lawmawm a tih thu a sawi bawk.

Nimin-a he hun hmanna ah hian ZMC Principal Dr. John Zohmingthanga chuan inlawmna thu sawiin, a bikin Mizoram State pawn atanga zirlai lo lut zawng zawngte lo lawmin duhsakna a hlan a. ZMC College Week chhunga inelna a tithate hnenah lawmman sem a ni bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar