Thla khata ZMC enkawlna senso nuai 438.22 vel; ZMC tan NMC-ah recognition dil mek a ni

Zoram Medical College (ZMC)-a Medical College bik enkawlna atana thla khata Mizoram sawrkar senso chu chawhrualin cheng nuai 438.22 a tling a. Hetihlai hian Central sawrkarin ZMC a la anih chuan faculty tam zawk leh MBBS seat tam zawk hawn theih beisei a ni.

Thla hmasa a New Delhi-a zin Chief Minister Zoramthanga chuan September 24, 2022 khan thuthar thehdarhtute kawmin sawrkar laipui hnena ZMC hlan chungchang hi a lo sawi tawh a, ZMC hlan tum a nih chhan chu sum leh pai chungchang bakah, Medical College tha an duh vang a ni tih sawiin, Sawrkar laipuiin a la a nih pawhin, seat awm zinga a zatve (50%) chu Mizoram tan hauh a nih thu a sawi bawk a. Hemi hnua RTI hmanga a zawhna, ZMC SPIO-in a chhan danin, ZMC-ah hian Zirtirtu (Teaching Staff) 90 an awm mek a, Non-Teaching Staff (Doctor, Nurse, Administrative Staff) 411 awm bawkin ZMC-a Medical College bik enkawlna atana thla khata Mizoram sawrkar senso zat (kum 2018-19 atanga 2021-22 Financial Year tawp thlenga chawhrualin) chu cheng nuai 438.22 vel zel a ni.

Central sawrkarin ZMC enkawl ta se, State sawrkarin a enkawl aia a thatna zawk tur chungchangah SPIO chuan India ram hmun hrang hrang atanga Faculty tam zawk lo kal thei tura beisei a nih thu leh MBBS Seat tam zawk hawn theih tura beisei a nih thu a tarlang a. SPIO tarlan danin a tira a hming put, Mizoram Institute of Medical Education & Research (MIMER) tih, a hnua ZMC tia thlak a nih vangin ZMC-in sawrkar laipui leh hmun dang atanga tanpuina sum a hmuh tur ang hmuh loh a neih phah lo a ni.

ZMC MBBS 1st batch (2018 Batch)-ten nakum February 27- March 17-ah MBBS Final Part 2 an exam anga, a pass-te chuan kum khat Internship an tih hnuah Doctor License an nei thei dawn a. License nei turin ZMC-in National Medical Commission (NMC) atanga recognition a neih a ngai a, chumi tur chuan NMC-ah dilna thehluh tawh a ni.

ZMC-a Doctor zir zingah Mizo 301 (1st batch-ah 74, 2nd batch-ah 77, 3rd batch-ah 79 leh 4th batch-ah 71) an awm mek a, August 7, 2018-ah hawn niin Medical College puitlinga pawm turin Medical Council of India/NMC-in vawi nga an endik tawh a, recognition hmu tura endik hmabak la niin, a hun tur NMC thu thu a ni.

Comments

Popular News (Last 30 Days)

LPG man bithliah thar