Hri leng ziaawm mek zel

Serchhip District-ah nimin khan COVID-19 hri kai hmuhchhuah leh enkawl dam an awm belh lova, kar hmasa Ningani hnu lamah hri kai hmuh thar leh enkawl dam an awm belh leh rih ta lo a, hri kai enkawllai mi pahnih awm mekin heng mite pawh hi an chhuak leh thei dawn hnai tawh nia hriat a ni.

Tarlan tawh angin Serchhip District-ah hian COVID-19 hri kai mi 14,607 hmuh ni tawhin an zinga 14,569 te chu enkawl dam ni tawhin hri kai enkawllai mi pahnih an awm mek a, hri kai zingah mi 36 an thi tawh a ni.

Mizoram-ah nimin tlai thleng khan hri kai enkawllai mi 32 la awmin hri kai enkawllai an tlem ve zel a, nimin khan sample 26 enfiah atangin hri kai mi pakhat hmuh belh a ni a, hri kai zingah mi 21 te anmahni enkawlna hmun atanga chhuahtir ni thungin nimin tlai thleng khan Mi-zoram-a COVID-19 hri kai hmuh tawh chu 2,38,747 an ni a, an zinga 2,37,992 te enkawl dam ni tawhin hri kai zingah za zela 99.68 te enkawl dam an ni tawh a, hri kai enkawllai mi 32 la awmin hri kai zingah mi 723 an boral tawh bawk a. September 21, 2022 hnu lamah hri kai te zingah boral an awm belh tawh rih loin thla khat chuang Mizoram-ah hri kai boral an awm tawh lo a ni.