Political Party hrang hrangte remtihnaa hming sign-in Grape Wine Rules a lo piang - Chief Minister
Chief Minister Zoramthanga chuan Mizoram in Grape kan tharte atanga siamchhuah Grape Wine chu dan ang thlapin kalpui a ni ta tih sawiin, “Political Party hrang hrangte remtihnaa hming sign thlapin Grape Wine Rules hi alo piang chhuak ta a ni,” a ti.
Champhai District tlawha zin Chief Minister Zoramthanga hian nimin zing khan Champhai Tlangsam-a Champhai Grape Winery chu tlawhin Grape chingtute hma ngaiin an sawrkar hmasak atang tawh khan hma an lo la tawh thin tih a sawi a, “Harsatna siam zawng leh a tibuai zawng a kalpui hi kan duh lo a, an sum puk cheng nuai 83 chuang pawh rulh ngai loin kan lo inngaidam tawh a ni,” a ti a. Grape Wine Rules chungchang sawiin, “Mizoram in Grape kan tharte atanga siamchhuah Grape Wine hi dan ang thlapin kalpui a ni ta a. Political Party hrang hrangte remtihnaa hming sign thlapin Grape Wine Rules hi alo piang chhuak ta a ni,” tiin Wine Rate tur hi ngaihtuah mek a nih thu a sawi bawk.
Grape Wine Market chungchang pawh sawiin Chief Minister chuan, “Project mumal tak siamin hma kan la ang a, abul tantu ka nih angin a theih ang angin Delhi tlang thlengin hma la turin kan kal zel ang. A sawngbawlna ah leh Market Intervention chungchangah te hma la turin Planning Department lam pawhin an buaipui thei ang,” a ti a. Grape leh Sapthei chu a hringtute zingah tel vea a inhriat thu leh a tuina a nih thu sawiin, kan ram leilung that zia leh thlai chi hrang hrangin a ngeih thu a sawi bawk.
Champhai Grape Winery a tlawhna ah hian Chief Minister hi Champhai Grape Grower Society ten lo dawngsawngin, harsatna hrang hrang an tawhna karah sawrkarin Grape Wine Rules an pass sak avanga lawmthu an sawi a. Grape chingtute Grape thar cheng vbc. 5 chuang man leisak tawh an nih thu leh MNF sawrkar hmasa ah khan MIP pawisa cheng nuai 83 chu hman niin, chu chu puk pawh nilo, rulh ngailoin an ngaihdam sak tak hmak thu an sawi a. Sawrkar in SEDP-ah pawh Grape chin thlan theih tura a siam te chu lawmawm an tih thu an sawi bawk a ni.
Comments
Post a Comment