MPTA in zirlai naupang 19 tanpuina an hlan

Mizoram Primary Teachers' Association (MPTA) chuan Endowment Fund atangin nimin khan zirlai naupang 19 te hnenah tanpuina Rs. 5000/- theuh an hlan.

MPTA hian zirlaite tanpuina dawng tur hi MPTA Sub-Hqrs. tin atanga zirlai pakhat zel thlangin zirlai 19 te hnenah an sem a, zirlai pakhat hi Rs. 5000/- zel pein hemi dawng tura Aizawl an panna senso an tumsak bakah Aizawl khawpui chhunga hmun pawimawh, an zirna atana tangkai tur hmun hrang hrang an fanpui nghal bawk a ni.

Nimin-a Zirlai naupangte tanpuina semna hun Synod Conference Centre, Aizawl-a neih hi School Education Minister Lalchhandama Ralte chuan hmanpuiin MPTA ten zirlai harsate tanpuina tur Endowment Fund an sem chu lawmawm a tih thu leh zirtirtute kawng hrang hranga an luangliam thin chu lawmawm a tih thu a sawi a, “Pechhuak tam apiang an hlim thin a ni,” a ti a. Tanpuina an sem chu a bultanna ni se, chhunzawm zelin midangte tihhmuhtu ah tang chho zel se a duh thu a sawi bawk.

Education Minister chuan Mizoram sawrkarin zirna chu ngaih pawimawh ah a nei tih pawh sawiin, Covid hrileng harsa karah a theih ang angin thawh zel a ni a, mipuite pawhin sawrkar Sikul-ah rinna an nghat chho zel tih a sawi a, tun hmaa School khar leh School kaihkawp tur ri tam tak kha tunah chuan School khar lam a ri ta meuh lo tih sawiin, “School-a hming ziak an pung a, Classroom indaih loh thu te, Thutthleng leh dawhkan indaihloh thu te hriat tur a tam ta a, zirna School-a thawk nih te, a enkawltu nihte pawh a nuam ta hle a ni,” a ti bawk.